İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 222 Hüküm no: 211 Orijinal metin no: [96-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Derviş Vakfı’ndan nalbant dükkânının yarısına sahip iken vefat eden Ali’nin varisi olduğunu iddia eden Âmine’nin verasetini ispat etmesi gerektiği Molla Derviş Vakfı’ndan Na‘alband dükkânı der-kurb-ı Sarıgez Ma‘rûz, Nezâret-i dâ‘îlerinde olan evkāfda Sarıgez kurbünde Sarı Nasuh mahâllesinde vâki‘ Molla Derviş Vakfı’ndan bir bâb Na‘alband dükkânının dört hisse i‘tibârıyla iki hissesi el-Hâc Ali nâm kimesnenin üzerinde iken bilâ-veled fevt olmağla mütevellîsi müezzin İbrahim mahlûldür deyü âhar hisse mutasarrıfesi zevcesi Sadıka nâm hatundan iddi‘â, ol dahi hisse-i mezkûre benim üzerimde iken zevcim fuzûlî üzerine etdirmiş deyü nizâ‘ esnâsında Mehmed nâm kimesne zuhûr ve müteveffâ-yı mezbûr Ali’nin vilâyeti olan Yabanâbâd kazâsında Karacaköy nâm karyede zevce-i uhrâsından on dört yaşında Âmine nâmında bir kızı vardır deyü tarafından vekâleten mahlûl olan nısf dükkânı da‘vâ edip lâkin beyana kādir olmamağla mu‘ârazadan men‘ olunup mahlûl olan nısf dükkânı mütevellî-i mezbûr yüz seksen guruş bedel mukābelesinde zevce-i mezbûre Sadıka’ya verip kat‘-ı nizâ‘ etmişler idi. Şimdi sâhib-i arzuhâl Hüseyin mezbûr Mehmed ve zevce-i mezbûre Sadıka ile meclis-i şer‘-i şerîfe gelip mezbûre Âmine müteveffâ-yı mezbûrun kızı olduğuna bir kıt‘a ihbâr i‘lâmı ibrâz ve tarafından vekâlet ile dükkân-ı merkūmun nısfını mütevellî-i mezbûrdan iddi‘â edip lâkin müteveffâ-yı mezbûrun vilâyetinde zevce-i uhrâsı ve kızı olmayıp mezbûre Âmine iddi‘â eden Hüseyin’in kızı olmağla müteveffâ-yı mezbûrun kızıdır deyü zevce-i mezbûre Sadıka’nın tahrîkiyle hilâf-ı vâki‘ da‘vâya tasaddî eylediklerini vukūfu olan bî-garaz Müslimîn haberleriyle tezvîr fehm olunup ve mütevellî-i mezbûr dahi hakīkat-i hâli tebyîn için kazâ-i mezbûra gitmeğe tâlib olmağla mütevellî-i mezbûr zevce-i mezbûre Sadıka’nın tarafından bir kimesne vekîl nasb olunup çavuş ma‘rifetiyle ve mezbûrân Hüseyin ve Mehmed ma‘iyyetleriyle kazâ-i mezbûra irsâl ve kādısı huzûrunda murâfa‘a ve hadd-i zâtında mezbûre Âmine müteveffâ-yı mezbûrun zevce-i uhrâsından mütevellide kızı mıdır veyâhud fi’l-vâki‘ Hüseyin’in kızı mıdır hakīkat-i hâl hârice çıkmak için tuğrâlı fermân-ı âlîleri sudûrunu istid‘â eylediği iltimâsıyla huzûr-ı âlîlerine i‘lâm olundu. Fî 7 Safer sene 1180.