İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 223 Hüküm no: 212 Orijinal metin no: [96-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır Çarşısı attarları ile kahve tüccarlarının sattıkları kahvenin fiyatının tayin olunması Nizâm-ı Kahve Bâ-sah İstanbul Kādısı fazîletlü efendi ve Gümrük Emîni Ağa Bundan mukaddemce Mısır Çarşısı attârlarıyla yerli kahve bazergânları beyninde olan nizâ‘ için attârân diledikleri bazergânlardan ve berrânîden bazârların kat‘ ve defterleri vechi üzere lüzûmu mikdâr kahve iştirâ etmek için verilen nizâma binâen attârân berrânî ta‘bîr olunur tâifeden yüz vakiye kahveyi yüz seksen guruşa iştirâ ve meshûkunun yirmi beş dirhemi yirmi bir akçeye iken iki akçe tenzîl ile on dokuz akçeye ibâdullaha bey‘ ederler iken bazergânlar tama‘-ı hâmlarından nâşî berrânî yedinde olan kahveleri kendüleri iştirâ ve ba‘zılarını ihâfe ile bey‘den men‘ ve bey‘ini kendülere hasr ile iki yüz guruşdan noksâna vermeyiz deyü ta‘annüt etdikleri ve berrânî tâifesinin ekserî kahveyi İzmir’den iştirâ etmeleriyle bazergân kahvesinden onar guruş masrafları ziyâde iken yüz seksener ve ba‘zıları yüz yetmişbeşer guruşa vermişler iken bazergânların inâd ve ısrârları ancak birbirleriyle olan te‘âzud ve ittifâklarına i‘tizâren olmağla [97] ibâdullaha şefkaten husûsları rü’yet olunmak lâzım gelmekle imdi hâlâ Mısır’da kahvenin otuz yedi vakiye olan bir kantarı yirmi altı riyâle ki bi-hesâb-ı guruş elli iki guruş eder ve her vakiyesine onar para masraf ile bu tarafda her kıyyesi kendülere altmış altışar paraya olup ve hâlâ İzmir’de dahi yüz vakiyesi elli altı ve elli üç guruşa olup yüz seksener guruşa verdikleri takdîrce her vakiyesi yetmiş ikişer paraya gelip ve Mısır hesâbı üzere her kıyyede altışar para fâiz hâsıl olur deyü erbâb-ı vukūf haber vermeleriyle hakīkat-i hâl bu vechile olduğu takdîrce mezbûrlar ol mikdâr fâize kanâ‘at etmek lâzım iken bundan ziyâde fâize tasaddîleri insâfdan hâric olup hâlik Yemen kahvesinin mashûkunun yirmi beş dirhemi dahi altı paraya fürûht olunmak matlûb olmağla bazergânları ihzâr ve şimdilik berrânî tâifesinin verdikleri gibi yüz seksen ve yüz yetmiş beş guruşa râzı olurlar ise fe-bihâ ve illâ Başmuhâsebe’de mukayyed olan ta‘ahhüdlerinin muktezâsı icrâ olunmak iktizâ eylediğini kendülere gereği gibi tefhîm ve nizâm-ı müstahseneye rabt ve eğer yine inâd ve muhâlefet ederi olursa i‘lâm eyleyesin deyü [buyruldu]. Fî 4 Safer sene 1180.