İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 224 Hüküm no: 213 Orijinal metin no: [97-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşı dahilinde yıkılmış olan hanların yeniden inşası halinde mutlaka kârgîr olarak inşa edilmeleri Münhedim olan kârgîr hanlar ahşabdan binâ olunmaya emir. Bâ-sah, İstanbul kādısı fazîletlü efendi Âsitâne-i sa‘âdet’de hanların kesreti mefâsid-i kesîreyi mûcib olduğuna binâen müceddeden binâsı memnû‘âtdan olduğundan mâ‘adâ ahşabdan olan hanlar münderis ve muhterik oldukda kadîmine i‘tibâr olunmayıp kârgîr binâ olunmak üzere mukaddemâ nizâm verilip madde-i mezbûre muhâfazası lâzım kavânîn-i beldeden iken bundan mukaddem vâki‘ olan zelzelede münhedim ve müşrif-i inhidâm olan kârgîr han odalarının ba‘zılarını şimdi ahşabdan olmak üzere binâya mübâşeret olunduğu haber verilmekle, imdi o makūle ahşabdan binâsına mübâşeret olunmuş han odalarını mi‘mâr ağa ma‘rifetiyle binâdan men‘ edip çarşı içinde ve havâlîsinde olan hanların muhtâc-ı binâ ve ta‘mîr olan odaları kadîmî üzere kârgîr binâ olunmak husûsunu ashâbına muhkem tenbîh ve çarşıdan ba‘îd olan kârgîr hanların muhtâc-ı ta‘mîr olan odalarını ashâbı zî-kudret ise kadîmî üzere kârgîr binâ etmek ve eğer zî-kudret değil ise civârında olanlar rızâ dâde olurlar ise harîkden masûn olmak için duvarları kârgîr ve sakfı ahşabdan olmak üzere binâsına ruhsat verilmek ve bi’l-cümle münhedim olmuş hân var ise o makūlelerin ahşabdan binâsına zinhâr ruhsat verilmeyip sâhiblerinin kârgîr binâsına kudreti var ise kârgîr binâ ve eğer yok ikes müteehhilîn hâneleri binâ olunmak üzere husûs-ı mezbûra dâir nezâret ve madde-i mezbûre izzetlü yeniçeri ağasına ve mi‘mâr ağaya dahi buyruldular ile tenbîh olunmağla bu bâbda her kim mütenebbih olmaz ise te’dîb için i‘lâma mübâderet eyleyesin deyü [buyruldu]. Fî 2 S sene [11]80.