İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 224 Hüküm no: 214 Orijinal metin no: [97-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da kereste ve sair yük taşıyan öküz arabacıları için iskele ve semtleri beyan edilerek fiyat tesbit edilmesi Arka ve at ve öküz arabaları için emir Bâ-sah İstanbul kādısı fazîletlü efendi. Âsitâne-i aliyye’de vâki‘ arka ve at hamallarının nizâmları bundan akdem bâ-fermân-ı âlî rü’yet olunup her iskele ve mahâllerin ve semtlerin tasrîhiyle sâbıkına kıyâsen fîleri vaz‘ ve defter bâlâsına fermân-ı âlî ısdâr ve zâbıta-i kaviyeye rabt olunup ancak yine Âsitâne-i sa‘âdetde kereste ve ahmâl-i sâire nakil eden öküz arabacılarının fiâtı müddet-i medîdden beri rü’yet olunmadığından bu def‘a ecr-i misillerinin [98] is‘âf ve musâ‘afı ücrete râzılar olmadıkları ve ibâdullaha gadr ve ızrâr ve ümenâ-yı ebniye ve evkāf-ı şerîfeye zahmet verdikleri âşikâr olduğu hasebiyle bunların dahi zâbıta-i müstahseneye ifrâğları mühim ve muktezî olmağla imdi Karagümrük’de mevcûd öküz arabalarını ihzâr ve kadîmden mukāyese olduğu vech üzere arabalarının mikdâr-ı hamallarını kendülerden suâl ile tahkīk eyledikden sonra her iskele ve her bir mahâl, semt için at hamallarına vaz‘ olunan fiâta kıyâs ve tatbîk ile ecr-i misil takdîr ve bu vechile nizâm ve tescîl ve müceddeden tahrîr ve defter edip bundan ziyâde mutâlebe ile ibâdullaha ızrâr kasdıyla huşûnet ederi olur ise haklarından gelineceğini dahi alâ-vechi’t-tehdîd tenbîh ve vakit vakit ahvâllerini tefahhus ve ziyâde ücret taleb ve ahz eder olur ise hakkından gelinmek için isim ve [r]esimleriyle i‘lâm eyleyesin deyü [buyruldu]. Fî 5 M sene [11]80.