İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 232 Hüküm no: 225 Orijinal metin no: [102-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Musa’nın Faslı Ahmed’de olan cariye bedelini kefili Pehlivan Ali’den tahsil etmesi Câriye semeninden bi-hükmi’l-kefâle 3000 [guruş] Ma‘rûz Horoz Ötmez Hanı’nda Esirci arzuhâl eden Musa b. Ömer Çarşamba günü Arz Odası’nda huzûr-ı âlîlerinde ma‘kūd meclis-i şer‘-i şerîfde Galata’da oturakçı olup ihzâr olunan Pehlivan Ali b. Mustafa mahzarında işbu hâzıra Mahbûbe nâm bikr câriye-i memlûkemi Galata’da Arablar Hanı’nda müsâfir olan Fâsî Ahmed b. Mehmed’e işbu târîhden on üç gün mukaddem zikr olunan Horoz Ötmez Hanı’nda üç bin guruşa nes’eten bey‘ ve teslîm eylediğimde ol dahi ba‘de’l-iştirâ ve’l-kabûl semen-i mezkûr üç bin guruşun edâsına ol meclisde işbu mezbûr Ali kefil ve zâmin oldukda, ben dahi ba‘de’l-kabûl mezbûr Fâsî Ahmed câriye-i mezbûreyi odasına götürüp bikrini dahi izâle etmekle mezbûr Ali’nin kefâletine binâen semen-i mezkûr üç bin guruşu taleb ederim deyü ba‘de’d-da‘vâ ve’l-istintâk mezbûr Ali cevâbında câriye-i mezbûreyi merkūm esirciden Fâsî-i merkūmun iştirâsına delâlet ve vesâtetini ikrâr lâkin kefâlet-i meşrûhasını inkâr etmekle beyyineye havâle olunmuş idi. Hâlâ mezbûr Esirci Musa târîh-i [i‘lâm] günü dâ‘îhâneye gelip müdde‘âsı üzere mezbûr Pehlivan Ali’nin kefâletini lede’t-tezkiye adâletleri ihbâr olunan han-ı mezkûr sâkinlerinden Koltukçu Ali b. Ahmed ve Arzuhâlci Hasan b. Mehmed nâm kimesneler şehâdetleriyle isbât etmeğin mûcebiyle bi-hükmi’l-kefâle semen-i mezkûr üç bin guruşu Pehlivan Ali’den şer‘an iktizâ eylediği bi’l-iltimâs huzûr-ı âlîlerine i‘lâm olundu. Fî 11 S sene 1180.