İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 233 Hüküm no: 227 Orijinal metin no: [103-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören Haseki İsmail Ağa’nın Üsküdar su yollarının tamiri ve Nasuh Efendi Zaviyesi’ne vakfettiği bakkal dükkânında keşif yapılması Bahçekapısı kurbünde keşif Sâdır olan fermân-ı âlîlerine imtisâlen savb-ı şer‘-i şerîf-i enverden irsâl olunan müderrisîn[den] keşif nâibimiz müderrisîn es-Seyyid Halil Efendi dâ‘îleri hâssa mi‘mârlarından el-Hâc Mustafa ve Yusuf Halîfeler ile mahmiye-i İstanbul’da Bahçekapısı hâricinde Bursa Tekyesi mahâllesinde vâki‘ arsası Ayasofya-i kebîr Vakfı’ndan ebniyesi Üsküdar kādıları efendiler nezâretinde olan evkāfdan Haseki İsmail Ağa nâm sâhibü’l-hayrın Üsküdar’da vâki‘ su yolları meremmâtına ve merhûm <> Nasuh Efendi Zâviyesinde eczâ-yı şerîfe vakıf eylediği icâre-i vâhide ile icâr olunagelen bakkāl dükkânına varıp mu‘âyene olundukda zikr olunan bakkāl dükkânı ve ittisâlinde berber dükkânı ve bakkāl mahzeni ve arpacı mahzeni ve üzerlerinde üç bâb ahşabdan odalar ve mahzenin sebkat eden zelzeleden ba‘zı mahâlleri münhedim ve ba‘zı mahâlleri inhidâma mâil olup ta‘mîre muhtâc ve ta‘mîr olunmadığı sûretde dahi z[iy]âde harâb olup vakfa zarâr-ı küllî terettüb edeceği müte‘ayyin olmağla hâlâ vakf-ı mezbûrun kāimmakām-ı mütevellîsi sâhib-i arzuhâl Haseki el-Hâc Mustafa müsakkafât-ı mezkûre galle-i vakıfdan kemâ-fi’l-evvel tecdîd ve ta‘mîr olunmak üzere kıbel-i şer‘-i şerîfden izin taleb eylediğini mezbûr dâ‘îleri mahâllinde ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 8 min-S sene [1]180.