İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 234 Hüküm no: 228 Orijinal metin no: [103-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar İbrahim’in buğdaycılık ticaretinden ortağı olan Ahmed Ağa ile ortaklığını feshetmesi Kapan tüccârından şerîki ile ibrâ Ma‘rûz, Kapan tüccârından İbrahim b. İsmail meclis-i şer‘-i hatîrde şerîki Ahmed Ağa b. Mustafa mahzarında mezbûr Ahmed Ağa ile buğdaycılık san‘atında şirket-i sahîha ile şerîk olup târîh-i i‘lâm günü mezbûr ile hesâbımızı Reisler Kethüdâsı ve sâir tüccâr ma‘rifetleriyle rü’yet eylediğimizde benim re’yim ile gerek sarrâfa ve gerek sâir mahâllere üç yüz altmış dört guruş masârıf ve zimmetimde dahi fâizden yüz yetmiş beş guruş zuhûr ve masârıf-ı mezkûreden fürû-nihâde olundukda masârıfdan yüz doksan dokuz guruş bâkī kalıp ve meblağ-ı bâkīnin nısfı olan doksan dokuz buçuk guruş mezbûr Ahmed Ağa’nın zimmetine isâbet etmekle bana teslîm ve edâ eyledikde ben dahi ahz u kabz edip mezbûr Ahmed Ağa zimmetinde gerek masârıf ve gerek fâizden aslâ hakkım bâkī kalmayıp husûs-ı mezkûra müte‘allıka da‘vâdan zimmetini ibrâ ve iskāt eyledim deyü ba‘de’l-ikrâr ve’t-tasdîk kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 11 S sene [1[180.