İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 234 Hüküm no: 229 Orijinal metin no: [103-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hasan’ın kuruyemişçi esnaflığından çıkarılması Kuruyemişçilik esnâfından ihrâc Ma‘rûz, Mahmiye-i İstanbul’da kuruyemişçi esnâfının arzuhâllerinde iştikâ eyledikleri Mehmed b. Hasan’dan meclis-i şer‘-i hatîrde Mehmed Yazıcı b. İbrahim rüşvet tarîkiyle on beş kıyye yağ ile on bir guruşumu ahz eyledi ve yine Alemdar Mustafa b. Mahmud rüşvet tarîkiyle beş guruşumu aldı ve yine Halil b. Mustafa sana bir şer atdım deyü ihâfe ile dört altınımı aldı ve yine el-Hâc Ali b. Hasan dükkânını artırırım deyü dört arşın çukamı aldı ve yine es-Seyyid Süleyman b. Mehmed karındaşımın dükkânı için beni altı yüz guruşdan çıkarıp ızrâr eyledi deyü her biri da‘vâ eylediğinden mâ‘adâ esnâf-ı mezkûrenin kethüdâsı el-Hâc Mustafa ve el-Hâc Hasan ve el-Hâc Mehmed ve diğer el-Hâc Mehmed ve İbrahim Çelebi ve Mustafa Çelebi ve Bekir Beşe ve diğer el-Hâc Mehmed ve Halil Çelebi meclis-i şer‘e hâzirûn olup mezbûr Mehmed için kendi hâlinde olmayıp müfsid ve müzevvir ve muzır olmağla dâimâ esnâfımız beynine ilkā-yı fesâd ve ızrâr eder deyü muvâcehesinde sû-i hâlini ihbâr ve içlerinden ihrâç ile şer ve mazarrâtının indifâ‘ını iltimâs eylediklerinde ol dahi fî-mâ-ba‘d esnâf-ı mezkûreden hurûc ve umûr ve husûslarına aslâ karışmayıp ve ızrâr etmemek üzere ta‘ahhüd ve mezbûrûnu te’mîn etmekle kat‘-ı nizâ‘ eyledikleri iltimâslarıyla huzûr-ı âlîlerine i‘lâm olundu. Fî 13 Saferi’l-hayr sene 1180.