İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 235 Hüküm no: 231 Orijinal metin no: [104-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçhane’de depremden zarar gören Haffafhane’deki dükkânların bina emini tarafından tamir ve bedelinin sahiplerinden tahsili Saraçhâne kurbünde olan Haffâfhâne’nin kepenkleri ve döşemeleri binâ emîni efendi ma‘rifetiyle binâ buyrulup ashâbından istirdâd oluna. Ma‘rûz, Cennet-mekân merhûm Ebulfeth Sultân Mehmed Han Evkāf-ı şerîfesinden Saraçhâne kurbünde Haffâfhâne dükkânları ashâbından arzuhâl eden Mehmed ve Halil ve el-Hâc Mehmed ve İbrahim Bey ve Mehmed Bey ve es-Seyyid Mehmed ve Bekir Ağa ve Ahmed Ağa ve diğer Halil ve İsmail Efendi ve Ali Ağa ve el-Hâc Ali ve Âişe ve Fâtıma nâm hatunlar ile mezkûr dükkânlarda olan haffâflar meclis-i şer‘-i şerîfe gelip zikr olunan Haffâfhâne’nin sokak kemerleri taraf-ı hazret-i cihândârîden matlûbumuz üzere şefkaten binâ ve ihsân buyrulup lâkin dükkânların kepenkleri ve boyunduruk üzerinde olan kalkanları ve döşemeleri dükkân sâhibleri tarafından binâ olunmak lâzım gelip hâlâ amele ve sâir levâzım-ı binâsını tedârike kudretimiz olmamağla Bezistan Çarşısı misillü binâ emîni efendi tarafından zikr olunan kepenkler ve kalkan ve döşemeleri binâ buyrulup ve ba‘de’l-itmâm mi‘mâr Ağa ma‘rifetiyle ba‘de’l-keşf iktizâ eden harc ve masârıfı eshâb-ı dekâkînden alınmak bâbında şefkaten fermân-ı âlîşân sudûrunu istid‘â ederiz deyü takrîr ve istirhâmları iltimâslarıyla huzûr-ı âlîlerine i‘lâm [olundu]. Fî 14 S sene 1180.