İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 237 Hüküm no: 233 Orijinal metin no: [105-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryora bt. Astori’nin menzil iddiasından men olunması Bâ-mühr-i Muhâsib Said Efendi Ma‘rûz, Mahmiye-i İslambol’da Mîrahor mahâllesinde sâkine ve şahsı mu‘arrefe arzuhâl eden Maryora bt. Astori nâm Nasrâniye meclis-i şer‘-i hatîrde mahâlle-i mezbûrede vâki‘ Kostanti Kilisesi Vakfı’ndan etrâf-ı erba‘ası vakf-ı mezbûrdan olan menzil ve Pertev Paşa Vakfı menzil ve Kiryazi menzili ve tarîk-i âm ile mahdûd ve iki yüz doksan beş buçuk zirâ‘ arsa üzerinde mebnâ büyût-ı adîdeyi ve bahçe ve dükkânı müştemil menzilin nısfına mütevellîsi temessüküyle İstarito bt. Kostanti mahlûlünden mutasarrıfe olan Vibtorya bt. Yorgi tarafından vekîli Yorgi nâm zimmî ile vakf-ı merkūm mütevellîsi Paskal nâm zimmî hâzır olduğu hâlde terâfu‘larında menzil-i mezkûrun nısf-ı şâyi‘i işbu yedimde olan mütevellî temessükü mantûkunca tedâvül-i eyâdî ile bana intikāl ve nısf-ı şâyi‘-i dahi merkūme İstarito’nun tasarrufunda iken ba‘de’l-vefât oğlu Yanaki nâm zimmîden tefevvüz ve mecmû‘u tasarrufumda iken mütevellîsi merkūm nısfını mahlûl olmak zu‘muyla müvekkile-i merkūme Vibtorya’ya tefevvüz etmekle taleb ederim deyü da‘vâ ve vekîl-i merkūm dahi cevâbında merkūme İstarito’nun oğlu merkūm Yanaki anası merkūmeden mukaddem hâlik olup merkūme İstarito bilâ-veled fevt olmağla mahlûl olup taraf-ı vakıfdan müvekkilem mezbûreye tefvîz etmiş idi deyü def‘ini mazbûtü’l-esâmi vukūfu olan kimesneler ihbâr eyledikden sonra müdde‘iye-i mezbûre Maryora dahi tefvîz iddi‘â eylediği merkūm Yanaki’nin anasından mukaddem hâlik olup ba‘dehû merkūme İstarito bilâ-veled hâlike olduğunu ikrâr u i‘tirâf etmeğin mûcebiyle menzil-i mezkûrun nısf-ı şâyi‘i için müdde‘iye-i mezbûre Maryora mu‘ârazadan men‘ olunduğu mahkeme-i muhâsebeden huzûr-ı âlîlerine i‘lâm olundu. Fî 14 Safer sene 1180.