İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 237 Hüküm no: 234 Orijinal metin no: [105-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütçü Mehmed’in, Beyoğlu’nda yoğurtçu olan İbrahim ve Mustafa’da olan alacağını kefile bağlayarak borçluların hapisten çıkarılmaları Ma‘rûz, Ashâb-ı arzuhâlden Südçü Mehmed b. Hüseyin sâdır olan fermân-ı âlîleriyle mahmiye-i İslambol’da meclis-i şer‘-i şerîfe ihzâr etdirdiği Galata hâricinde Beyoğlu’nda Yoğurtçu kârhânesi olan medyûnları es-Seyyid İbrahim b. Ahmed ve es-Seyyid Mustafa b. Mustafa mahzarlarında yedlerinde olan i‘lâm mantûkunca süd semeninden mahkûmün-bih dört yüz kırk yedi guruş hakkını da‘vâ ve mutâlebe, onlar dahi ba‘de’l-ikrâr istimhâl edip târîh-i i‘lâmdan otuz güne dek deyn-i mezkûru edâya ta‘ahhüd ve eğer edâ etmezler ise kârhânelerinde mevcûd gedik ta‘bîr olunur yoğurtçu âlâtını semen-i misliyle âhara bey‘e ve kabz-ı semene ve deyn-i merkūmu edâya ve fazlasını kendülere îsâle taraflarından azil ve in‘izâlden masûne vekâlet-i devriye ile hâzır bi’l-meclis Yoğurtçular Kethüdâsı Mustafa b. Ali nâm kimesneyi tevkîl etdiklerinde ol dahi ba‘de’l-kabûl dâyin-i merkūm Mehmed dahi vech-i meşrûh üzere râzı olup deyn-i merkūm tecîl ve mezbûrânı hapisden ıtlâk eylediği tescîl-i şer‘î olunup bi’l-iltimâs huzûr-ı âlîlerine i‘lâm olundu. Fî 16 Safer sene 1180.