İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 238 Hüküm no: 236 Orijinal metin no: [106-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa Hamamcısı İbrahim’in kadınlar kısmına uygunsuz kimselerin girmesine izin vermeyeceğine taahhütte bulunması Saraçhâne kurbünde İbrahim Paşa Nisvân hamamına fevâhiş girmemeğe hamamcısı ta‘ahhüd Ma‘rûz, Ashâb-ı arzuhâl Mimar İyaz mahâllesi ahâlîleri İmam el-Hâc Mustafa Efendi ve Mehmed Emin Efendi ve Mehmed Odabaşı ve İbrahim Ağa ve Berber Mehmed Çelebi ve Süleyman Odabaşı ve Müezzin Molla Mustafa ve el-Hâc Hasan ve Küçük Mehmed ve Mustafa Ağa ve Osman Odabaşı ve Hâfız Mehmed ve es-Seyyid el-Hâc Mehmed nâm kimesneler meclis-i şer‘-i şerîfde mahâlle-i mezbûrede vâki‘ İbrahim Paşa Hamamı müsteciri derûn-ı arzuhâlde mezkûrü’l-ism İbrahim nâm kimesne mahzarında mezbûr İbrahim karılar hamamına zevcesini ikāmet edip ol dahi rü’yete kādire olmayıp ve kendi dahi müsâmaha etmekle dâimâ fevâhiş makūlesi girip ve kapısı önünde mükâleme etmeleriyle nizâ‘a müeddî ve emniyetimiz meslûb olmuşdur deyü teşekkî ve mezbûr İbrahim’in adem-i rü’yetinden nâşî hamam-ı merkūmdan ihrâcını iltimâs eylediklerinde mezbûr İbrahim dahi fî-mâ-ba‘d karılar hamamında anası Ümmügülsüm nâm hatunu ikāmet ve ol makūle fevâhişi hamamına aslâ uğratmayıp ve kapısı önünde dahi mükâleme etdirmemek üzere ta‘ahhüd ve eğer hilâf-ı zuhûr ederse hamam-ı mezkûrdan ihrâç olunmağa râzı olup bu vechile ahâlî-i mahâlleyi te’mîn etdikde onlar dahi bu minvâl üzere kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 16 Safer sene [11]80.