İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 239 Hüküm no: 237 Orijinal metin no: [106-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzadebaşı Camii Kayyumbaşısı Mehmed Efendi’ye verilen bahşişlerden kayyum ve tabaka kayyumu olan Mehmed’e de hisse verilmesi Şehzâde Câmi‘-i şerîfinin Tabaka Kayyûmbaşılığı Nizâmı Ma‘rûz, Şehzâde Câmi‘-i şerîfinde yevmî üç akçe ile kayyûm ve iki akçe ile tabaka kayyûmu ve imâret ta‘âmcılığı cihetlerine mutasarrıf olan sâhib-i arzuhâl es-Seyyid Mehmed Çarşamba günü Arz Odası’nda Haremeyn-i muhteremeyn müfettişi efendi dâ‘îleriyle huzûr-ı âlîlerinde akdolunan meclis-i şer‘-i hatîrde câmi‘-i mezkûrda kayyûmbaşı olan Mehmed Efendi mahzarında tabaka kayyûmluğu vazîfe-i mezkûre ile bâ-berat üzerinde iken mezbûr Mehmed Efendi bana zabt etdirmeyip miftâhını kendi kabz ve tabaka-i mezkûreye ba‘zı kimesneler eşyâ getirip vaz‘ ve îdâ‘ ve mezbûr kayyûmbaşıdan istihfâz edip ve birer mikdâr akçe vermeleriyle verdikleri akçe bana âid iken mezbûr bi-gayrı hakkın ahz eder deyü da‘vâ, lâkin mezbûr es-Seyyid Mehmed kendi hâlinde olmayıp mezbûr kayyûmbaşısının yedinde olan müte‘addid i‘lâmlar mantûklarınca altmış üç senesinde Müfettiş-i Evkāf-ı Haremeyn Nimetullah Efendi huzûrunda babası es-Seyyid Ahmed zamânında husûs-ı merkūm için murâfa‘a ve mezbûr es-Seyyid Ahmed şer‘an men‘ olunup ve yine târîh-i mezbûrda tekrâr murâfa‘a olup hadîdü’l-lisân olmağla hademe-i câmi‘-i mezkûrun ırzlarını kelimât-ı şenî‘a ile hetk ve ta‘cîz ve hizmet-i mezkûreden men‘le te’dîb olunup ba‘dehû altmış yedi senesinde tekrâr murâfa‘a ve gerek babasından ve gerek mezbûr es-Seyyid Mehmed’den emniyetleri olmadığını ihbâr ve husûs-ı mezkûr için mu‘ârazadan men‘ olunup ve iki buçuk ay mukaddem dahi Sadr-ı rum sa‘âdetlü semâhatlü efendi hazretleri Haremeyn müfettişi efendi dâ‘îleriyle tekrâr murâfa‘alarında hademe-i câmi‘-i şerîf-i mezbûr es-Seyyid Mehmed’in akvâl ve ef‘âlinden emn ü rahatları olmamağla teşekkî ve fî-mâ-ba‘d kendi hâlinde olmak şartıyla tarafından hizmetlerini rü’yete oğlu es-Seyyid Abdullah’ı tevkîl ve hademe-i mezbûreyi te’mîn eylediği musarrah olduğundan mâ‘adâ mezbûr kayyûmbaşıya vedâyi‘-i mezkûre zımnında verilen akçe hîle makūlesinden olmağla ol akçeyi iddi‘â şer‘an mesmû‘a olmayıp ve selâtîn cevâmi‘inde ol makūle vedî‘alar kayyûmbaşılara teslîm oluna [107] gelip mezbûr es-Seyyid Mehmed vech-i meşrûh üzere mü’temen olmamağla ibâdullahın eşyâsı mezbûre teslîm olunmak re’y-i sevâb dahi olmayıp lâkin husûs-ı mezkûru yine da‘vâya tasaddî etmemek şartıyla kayyımbaşılara verilen akçeden mezbûra hisse tarh ve tatyîb olunmak üzere mürüvveten? re’y buyrulmağla vech-i meşrûh üzere kayyûmbaşı aldığı akçeden mezbûra dahi hisse vermek üzere beynleri tevfîk olunup kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 8 min-Safer sene 1180