İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 240 Hüküm no: 238 Orijinal metin no: [107-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa’nın alacağı olan Manol v. Foti ile anlaşması İbrâ. Ma‘rûz, Hâmil-i arzuhâlin hasmı İsmail Ağa b. el-Hâc İbrahim meclis-i şer‘-i hatîrde hâmil-i arzuhâl Manol v. Foti muvâcehesinde merkūm Manol yetmiş sekiz senesi Ramazan-ı şerîfinin yirmi dördüncü günü malımdan bin beş yüz guruş istidâne ve kabz ve mukābelesinde Hadîce Hanım Vakfı’ndan tasarrufunda olan menzili vefâen bâ-re’y-i mütevellî bana ferâğ etmekle meblağ-ı mezkûr bin beş yüz guruşu taleb ederim deyü da‘vâ, ol dahi cevâbında müdde‘î-i merkūm bana ancak nakid altı yüz guruş verip dokuz yüz guruşu mukābelesinde işbu mu‘âyene olunan sîmli üç gaddâre ve üç debbûs ve on sîm zarf ve bir gülâbdân ve buhurdan ve bir çift sîm kuşak ve bir sîm kahve ibriği ve leğen ve ibrik hurdesi ve bir altın sâ‘ati nes’eten bey‘ edip ve zikr olunan gümüşleri bilâ-zarâr tahlîs mümkün olmamağla fesâdına binâen red murâd ederim deyü ba‘de’l-münâza‘a bâ-vesâtet-i Müslimîn mezbûr İsmail Ağa zikr olunan üç gaddâre ve üç debbûs ile sâ‘ati kıymeti olan üç yüz guruş mukābelesinde geri kabz etdikde merkūm Manol dahi nakden müdde‘î-i mezbûra bin guruş teslîm ve edâ edip meblağ-ı mezkûra murâbaha nâmıyla verdiği iki yüz yirmi beş guruşdan müdde‘î-i mezbûrun zimmetini ibrâ etdikde ol dahi deyn-i merkūmdan bâkī kalan iki yüz guruş da‘vâsından merkūm Manol’ün zimmetini ibrâ ve iskāt ve menzil-i mezkûru bâ-re’y-i mütevellî yine merkūm Manol üzerine ferâgat etdikde merkūm Manol dahi kabûl ve cihet-i mezkûreden biri birinde aslâ hakları bâkī kalmadığını ikrâr ve bu minvâl üzere kat‘-ı münâza‘a eyledikleri mübâşiri iltimâsıyla huzûr-ı âlîlerine i‘lâm olundu. Fî 18 Safer sene [1]180.