İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 241 Hüküm no: 240 Orijinal metin no: [108-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Piço’nun, bakkal gediği hakkında Dimitri’den taleb ettiği meblağı Todori’den istemesi gerektiği Hukūk Ma‘rûz, Hâmil-i arzuhâl Irgadpazarı’nda Bakkāl Piço zimmî meclis-i şer‘-i hatîrde şerîki Dimitri ile terâfu‘larında dükkânının dört hissede üç gediğini iki yüz elli guruş sermâye ve kırk dokuz buçuk guruşluk peynir ile merkūm Dimitri’ye teslîm edip hâlâ zikr olunan peynir ve sermâyeden yüz guruş noksân olmağla merkūm Dimitri’den iddi‘â edip lâkin hâzır bi’l-meclis Matyo nâm zimmî mezbûrânın hesâblarını bundan akdem rü’yet edip zikr olunan peynir akçesi kırk dokuz buçuk guruş ile sermâyeden noksân olan yüz guruşu merkūm Dimitri’den mukaddem dükkânlarına ikāmet eyledikleri gāib ani’l-meclis Todori zimmînin ahz ve istihlâkiyle zimmetine terettüb eyleyip merkūm Dimitri’nin yedinde ancak sermâyeden yüz elli guruş bâkī kaldığı tarafeynin ikrâr ve tasdîkiyle müte‘ayyin olmağla müdde‘î-i merkūmun iddi‘â eylediği noksân-ı sermâye yüz guruş ile peynir akçesi olan kırk dokuz buçuk guruşu gāib-i mezbûr Todori ile terâfu‘larına tevakkuf eylediği bi’l-iltimâs huzûr-ı âlîlerine i‘lâm olundu. Fî 18 Safer sene 1180.