İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 242 Hüküm no: 241 Orijinal metin no: [108-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defter Emini Mehmed Efendi ile Silahdar Kâtibi Abdurrahman Efendi arasındaki ocak davasında anlaşma sağlanması İzzetlü Rakım Mehmed Efendi’nin ocağı nizâ‘ı Ma‘rûz, Sâhibe-i arzuhâlin civârında sâkin hâlâ Defter Emîni izzetlü Mehmed Efendi hânesi matbâhının müteezzî olduğunu iştikâ birle bu dâ‘îlerine ve mi‘mâr ağa kullarına husûs-ı mezbûru kemâ-yenbağī rü’yet ve zikr olunan ocağının hâne-i mezbûre zarâr-ı şer‘îsi var mıdır mu‘âyene ve hakīkat-i hâli ve iktizâsını i‘lâm eyleyesin deyü fermân-ı âlîlerine imtisâlen taraf-ı dâ‘îlerinden keşif nâibimiz mi‘mâr ağa ve mübâşir ta‘yîn olunan Sadrıâzam ağalarından el-Hâc İbrahim Ağa ile hâne-i mezkûre varılmak üzere iken hâlâ sâhibe-i arzuhâlin zevci Hâcegân-ı Dîvân-ı hümâyûn’dan Silahdâr Kâtibi Abdurrahman Efendi ve efendi-i mûmâ-ileyh tarafından vekîl-i müseccelleri el-Hâc Yusuf Ağa dâ‘îhâneye gelip beyne’l-câr ri‘âyet-i hâtır umûr-ı mesnûneden olmağla bu husûsa dâir nizâ‘larından zikr olunan ocağın buhar ve şerâresinden müteezzî olmayıcak mertebe terfî‘a ve aşçılar için mebnâ kenîfin kapısı sâhibe-i arzuhâlin pencerelerine karşı olmağla tahvîle vekîl-i mezbûr ta‘ahhüd etdikde mûmâ-ileyh Abdurrahman Efendi dahi râzı olup tarafeynin tayyib-i hâtırlarıyla bu tarîk üzere ref‘-i nizâ‘ olunduğu huzûr-ı âlîlerine i‘lâm olundu. Fî 18 Safer sene 1180.