İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 243 Hüküm no: 242 Orijinal metin no: [108-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balçık İskelesi’ne yanaşan gemilere yük yüklemek için konulmuş olan ve iptal edilen darağacının yeniden açılması Balçık İskelesi’nde olan kadîm darağacı mu‘attal olmağın işlemesine Ma‘rûz, Balçık İskelesi husûsu için bu dâ‘îlerine sâdır olan fermân-ı âlîleriyle derkenâra ve i‘lâmlara nazar olundukda Balçık İskelesi’ne gemiler yanaşmak mümkün olmayıp sandallara yük tahmîl etmek için darağacı vaz‘ olunmağla Varna İskelesi Gümrüğü Mukāta‘ası mutasarrıfları Silistre ve Ruscuk ve Ziştovi bazergânları hamûlelerin Balçık İskelesi’ne indirmekle Varna İskelesi’nin ta‘tîline ve gümrük malının noksânına sebeb olup ve mîrî iskele var iken âhar yerde gemiler yük çıkarmamak şurûtundandır deyü Balçık İskelesi’ne yük indirmeğe medâr olan darağacı yetmiş yedi senesinde fermân-ı âlî ile kal‘ etdirilmeleriyle ol havâlînin tüccârı târîh-i mezkûrdan beri zahîre ve metâ‘larını Varna İskelesi’ne götürüp, lâkin naklinde su‘ûbetleri olmağla yine Balçık İskelesine müsâ‘ade buyrulmasını [109] mübârek rikâb-ı müstetâba arzuhâlleriyle istid‘â etdiklerinde hakīkat-i hâl mahâllinden isti‘lâm olunmak bâbında şeref-sudûr eden fermân-ı âlîşân mûcebince Silistre ve Balçık nâibleri Balçık İskelesi’ne zahîre ve emti‘â naklinde ol havâlî tüccârına her vechile suhûlet olduğunu bi’l-istihbâr i‘lâm etmeleriyle defterdâr-ı sâbık efendiye havâle buyruldukda zikr olunduğu üzere darağacının kal‘ını ve Varna Gümrüğü’nün şurûtu ve kuyûdunu bast ü beyan ve tahkīk-i madde için mezkûr iskeleye amed-şüd edenlerden Âsitâne’de mevcûd erbâb-ı vukūfdan hakīkat-i hâl suâl ve iktizâsını i‘lâm eylemek için İstanbul Gümrügü Emîni Ağa kullarına havâle olunmak üzere âhar arzuhâlleri üzerine tehlîs eylediğini tahrîr etmekle gümrük emîni ağadan istifsâr olundukda Âsitâne’de mevcûd yirmi nefer tüccârdan suâl ve onlar dahi i‘lâmât-ı merkūmede tafsîl olduğu vech üzere takrîr eylediklerini ve ba‘dehû Balçık İskelesi’nden zehâir tevârüdü nâdir olup ekserî Varna İskelesi tarafından Varna Gümrüğü kâtibi defteriyle doğru İstanbul Gümrüğü’ne vâsıl olmağla bu tarîk ile gelen sefâinin hamûleleri mazbût olduğunu gümrük defterleri nâtık ve gümrük hademesinin minvâl-i meşrûh üzere ihbârlarını i‘lâm eylediğini takrîr eyledikden sonra ber-mûceb-i emr-i âlî Âsitâne’de mevcûd Silistre ve Pazarcık tüccârından isimleri mazbût kimesnelerden suâl olundukda Varna İskelesi Silistre’ye yirmi dört sâ‘at mesâfe ve yolları balkan ve dağlık ve sa‘bu’l-mürûr ve mahûf olmağla eşyâ nakli asîr ve ziyâde masrafa muhtâc olup lâkin Balçık iskelesi Silistre’ye on sekiz sâ‘at ve Pazarcık’a sekiz ve on sâ‘at ve yolları basit ve düz olmağla zahmet çekilmeyip masârıf-ı kalîle ile naklolunup Balçık İskelesi’ne müsâ‘ade olunduğu sûretde zahîre ve metâ‘ımızın Âsitâne’ye bir an akdem vusûlüne sebeb gerek bize ve gerek ibâdullaha nef‘ hâsıl olup ve mahâll-i mezkûrda darağacı yakın zamânda ihdâs olunmayıp kadîmden beri vaz‘ olunagelmişdir deyü ihbâr eyledikleri ma‘lûm-ı devletleri buyruldukda ihbârları muktezâsınca tüccâra suhûlet ve emn hâsıl ve zehâirin bir an evvel vürûduna sebeb olması melhûz olup lâkin hakīkatde bu husûsun zarâr ve nef‘i mukāta‘ateyn-i mezkûreteyne âid ve râci‘ olup ve Balçık İskelesi’nden darağacının kal‘ı mîrî iskele var iken âhar yerde gemiler yük çıkarmamak üzere İnöz Gümrüğü’ne kıyâs ile olduğu şurûtundandır deyü defterdâr efendi telhîsinde tasrîh olunup lâkin Varna İskelesi mîrî olup Balçık İskelesi mîrî olmadığı müstefâd olmamağla tekrâr sa‘âdetlü defterdâr efendiye havâle buyrulmak bâbında emr ü fermân hazret-i men-lehü’l-emrindir. Fî 19 Safer sene 1180.