İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 245 Hüküm no: 244 Orijinal metin no: [110-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüsrev Camii Vakfı mütevellisi Mustafa Efendi’ye olan borcunu ödemesi hususunda Mehmed Çavuş’a tenbih olunması Eğrikapı’dan Hukūk, 105 [guruş] Ma‘rûz, Sâhib-i arzuhâlin hasmı Eğrikapı hâricinde Hacı Hüsrev Câmi‘i Vakfı mütevellîsi İmam Mustafa Efendi meclis-i şer‘-i hatîrde sâhib-i arzuhâl Mehmed Çavuş b. Osman mahzarında mezbûr Mehmed mütevellîsi olduğum mâl-ı vakf-ı mezkûrdan istidâne eylediği üç yüz guruş mukābelesinde Eğrikapı dâhilinde Zeyneb Hatun Vakfı’ndan tasarrufunda olan menzili bâ-re’y-i mütevellî bana ferâğ ve ba‘de’t-tahliye yetmiş üç Cemâziyelâhiresi’nden her sene kırk beş guruş icâre ile benden isticâr ve kabûl ve işbu seksen senesi Muharremi tamâmına gelince mutasarrıf olup ve sinîn-i mezkûrede müctemi‘a olan üç yüz guruş icâreden yüz doksan beş guruşunu yedinden ahz ve yüz beş guruşu zimmetinde bâkī kalmağla asl-ı mâl-ı mezkûr ile icâre-i mezkûreyi taleb ederim deyü da‘vâ ol dahi cevâbında ber-ve[ch-i] muharrer deyni olduğunu ikrâr, lâkin icâre-i mezkûreden kırk beş guruş deynim bâkī kalmağla geçen sene Cemâziyelevveli’nde Cebehânede kırk beş [guruş] dahi edâ eylediğimde ahz u kabz-ı icâre-i mezkûreden zimmetimde bir akçe bâkī kalmadığını ikrâr etmiş idi deyü def‘ edip, imam-ı mezbûr dahi cevâbında müdde‘î-i mezbûr icâre-i mezkûreden yüz beş guruşu zimmetinde bâkī deyni kaldığını işbu Muharrem’in onuncu günü Eğrikapı’da kasab dükkânı önünde hesâb gördüğümüz hînde ikrâr ve işhâd dahi etmiş idi deyü def‘ ve def‘ini mahâllerinden lede’t-tezkiye udûlden olduklarını ihbâr olunan mahâll-i mezkûrda Kasab Hasan b. Süleyman ve Eğrikapı hâricinde sâkin Yorgancı kalfası el-Hâc Mustafa b. Kasım nâm kimesneler şehâdetleriyle isbât etmeğin mûcebiyle icâre-i mezkûre ile asl-ı mâl-ı mezkûr üç yüz guruşun edâsına merkūm Mehmed Çavuş’a tenbîh olunduğu mübâşir çavuş kulları iltimâsıyla huzûr-ı âlîlerine i‘lâm olundu. fî 17 Safer sene 1180.