İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 248 Hüküm no: 248 Orijinal metin no: [112-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Serdengeçti Ali Ağa’nın varislerinden Molla Hasan’ın, İsmail b. Ali aleyhindeki cariye davasından men olunması Mu‘âraza’dan men‘ Ma‘rûz, Ahıska sancağında Livâne kazâsına tâbi‘ Başköy nâm karye ahâlîsinden olup iki sene mukaddem karye-i mezbûrede katlolunan Serdengeçti Ali Ağa b. Molla Mehmed nâm kimesnenin verâseti zevcesi Âişe ile sulbî kebîr oğlu arzuhâl eden Molla Hasan’a münhasıra olmağla mezbûr Molla Hasan Çarşamba günü Dîvân-ı âlî’de ma‘kūd meclis-i münîrde arzuhâlde mezkûr kapan tüccârından el-Hâc İsmail b. el-Hâc Ali mahzarında karye-i mezbûrede babam mezbûr Ali katlolunduğu esnâda câriye-i memlûkesi olan açık kaşlı, kara gözlü alçak boylu Gürciyetü’l-asl takrîben altı yaşında Hadîce nâm sagīreyi Süleyman Bey nâm kimesne bi-gayrı hakkın ahz ve Eyüb Ağa oğlu nâm kimesneye verip ol dahi Âsitâne’ye getirip işbu mezbûr el-Hâc İsmail’e bey‘ edip câriye-i mezbûre hâlâ menzilinde ve vâzı‘ü’l-yed olmağla hisse-i ma‘lûmemi taleb ederim deyü ba‘de’d-da‘vâ ve’l-inkâr ve eser-i talebü’l-beyyine mezbûr Molla Hasan müdde‘âsına bir nefer kimesne ikāme, ol dahi edâ-yı şehâdet edememekle cerh olundukda ityân-ı beyyineden izhâr-ı acz etmeğin talebiyle mezbûr el-Hâc İsmail vech-i şer‘î üzere tahlîf olunup müdde‘î-i mezbûr Molla Hasan bilâ-beyyine-i âdile mu‘ârazadan men‘ olunduğu mübâşiri ( ) Çavuş kulları iltimâsıyla huzûr-ı âlîlerine i‘lâm olundu. Fî 21 Safer sene 1180.