İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 248 Hüküm no: 249 Orijinal metin no: [112-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Ali’nin Kubad Çavuş Vakfı mütevellisi Ahmed Efendi’ye müdahaleden men olunması Kubad Çavuş Vakfı’nın tevliyeti Ma‘rûz, Şumnu ahâlîsinden arzuhâl eden Molla Ali Çarşamba günü arz odasında huzûr-ı alîlerinde akdolunan meclis-i şer‘-i münîrde Süleymaniye Câmi‘-i şerîfinde Kubad Çavuş Vakfı’nın mütevellîsi olan derûn-ı arzuhâlde mezkûrü’l-ism İmam es-Seyyid Ahmed Efendi ile terâfu‘larında Kubad Çavuş tevliyeti Vakfı’nın evlâd-ı atikātına meşrûta olup ve ben vâkıfın atikātından Saliha’nın kızı Fâtıma’nın oğlu Abdi’nin kızı Havva’nın evlâdından olup aslah ve erşed olmamla altmış sekiz senesinde tevliyet-i mezkûreyi mezbûr Abdi’nin mahlûlünden üzerime berat etdirdip hâlâ tasarruf murâd eylediğimde imam-ı mezbûr mümâna‘at eder deyü da‘vâ ve imam-ı mezbûr cevâbında benim mütevellîsi olduğum Kubad Çavuş Vakfı ancak nukūd vakfı olup ve nukūd-ı mezkûre ile yine vakf-ı mezkûra [113] benden mukaddem mütevellî olan ceddim ve pederim zamânlarında menziller iştirâ ve ba‘dehû menâzil-i mezkûreden hâsıla olan mu‘accele ile yine menziller iştirâ olunup hâlâ on bir bâb menzil olup ve Süleymaniye Câmi‘-i şerîfi’nde imam-ı evvel olanlara meşrûta olmağla mezbûr Molla Ali’nin benden da‘vâ eylediği tevliyet âhar Kubad Çavuş tevliyetidir deyüp ve imam-ı mezbûrun ceddi ve pederi ve kendisi elli seneden mütecâviz tevliyet-i mezkûreye mutasarrıf olduklarını yedinde olan senedât nâtıka ve mürtezika-i vakfın ihbârlarıyla dahi mütehakkık olup hâlâ imam-ı mezbûrun üzerinde olan Kubad Çavuş tevliyeti da‘vâ eylediği Kubat Çavuş tevliyeti olduğunu mezbûr Molla Ali tûl-i ahde binâen isbâta kādir olamayıp ve aslahiyet ve ekberiyet kaydlarıyla berat etdirip lâkin ibrâz eylediği vakfiyesinde tevliyet-i mezkûre derecede müsâvî olanlara meşrûta olup ekberiyet kaydı olmayıp ve hâlâ derecede kendi ile üç nefer kimesne olduğunu ikrâr etmekle yedinde olan vakfiyenin sıhhati da‘vâ etdiğine binâen yalnız kendisinin bi’t-tevliye da‘vâsı mesmû‘a olmamağla hâlâ imam-ı mezbûrun tasarrufunda olan Kubad Çavuş nukūd-ı mevkūfesi tevliyetine ve nukūd-ı mezkûre ile iştirâ olan menâzile ta‘arruzdan men‘ olunduğu huzûr-ı âlîlerine i‘lâm olundu. Fî 25 Safer sene [11]80.