İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 250 Hüküm no: 251 Orijinal metin no: [113-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Teberdar Kasım Vakfı mütevellisi Abdülhalik Efendi’nin Mehmed ve Nimetullah’ın tasarrufunda olan menzile müdahaleden men olunması Mu‘ârazadan men‘ Ma‘rûz, Mahmiye-i İstanbul’da nezâret-i dâ‘îlerinde olan evkāfdan Teberdâr Kasım Vakfı’ndan olmak üzere zikri âtî menzilin binâsından hisse-i şâyi‘a iddi‘â eden Mehmed Meclis-i şer‘-i enverde bundan akdem vefât eden Âmine nâm hatunun kızı mu‘arrefetü’z-zât Nimetullah ile usûbet-i nesebiye cihetinden vârisi olmağla menzil-i mezkûr mülkiyet üzere vaz‘-ı yedi mütehakkık olan İbrahim mahzarında mahmiye-i mezbûrede Cibâli kurbünde Üskübî mahâllesinde vâki‘ bir tarafdan mekteb ve bir tarafdan Çörekçi Halil menzili ve iki tarafdan tarîk-i âm ile mahdûd büyût-ı adîdeyi müştemil menzilin ebniyesi taraf-ı vakf-ı mezkûrdan dört hisse i‘tibârıyla iki hissesi mezbûre Nimetullah’ın ve bir hissesi kaynım Osman nâm kimesnenin ve bir hissesi dahi oğlum diğer Mehmed’in ferâğından benim üzerimde iken altmış dokuz senesinde muhterik oldukda mezbûrânın mûriseleri ve benim kayınvâlidem olan mezbûre Âmine hâlâ mevcûde ebniyesini malından vakf-ı mezkûre teberru‘an binâ ve benim bir hissem dahi dâhil olmağla mezbûrân İbrahim ve Nimetullah ebniye-i mezkûrdan benim hisseme fuzûlî vaz‘-ı yed ederler deyü da‘vâ ve mezbûrân cevâblarında mûrise-i mezbûre Emine ebniye-i mezkûreyi ba‘de’l-harîk nefsi için mülkü olmak üzere binâ ve vefâtından sonra bize mevrûs olup hattâ mezbûr Mehmed geçen sene Ramazan-ı şerîfinde vech-i meşrûh üzere ebniye-i mezkûre-i mevcûdeyi mezbûre Âmine vakfa teberru‘an binâ eyledi deyü hissesini bizden da‘vâ ve ol vakitde müdde‘âsını isbâta kādir olmamış idi deyü bir kıt‘a i‘lâm ibrâz edip lâkin mezbûr Mehmed bu [114] sûretde mezbûrana ebniye-i mezkûre da‘vâsında hasm-ı şer‘î olmayıp husûs-ı mezkûr vakf-ı mezbûr mütevellîsinin da‘vâsına tevakkuf etmiş idi. Hâlâ vakf-ı mezbûrun mütevellîsi olan es-Seyyid Abdülhalik meclis-i şer‘-i hatîrde mezbûre Nimetullah ile tekrâr murâfa‘alarında menzil-i mezkûrun ebniyesi için vech-i meşrûh üzere mezbûre Emine’nin vakfa teberru‘an binâ eylediğini mütevellî-i mezbûr dahi ityân-ı beyyineden izhâr-ı acz etmekle talebiyle mezbûre Nimetullah’a adem-i ilmine tahlîf-i şer‘î ile tahlîf olunmağın mütevellî-yi mezbûr bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 S sene [11]80.