İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 251 Hüküm no: 252 Orijinal metin no: [114-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat ettiği bildirilen Ali b. Abdullah’ın hayatta olması nedeniyle İstanbul Bezzaz ve Abacılar kethüdalığının kendisine tahsisi talebi Mukaddemâ hazîne-mânde olan kırk akçe ekmeği mukābilinde Abacılar Kethüdâlığı ihsân. Ma‘rûz, Sâdır olan fermân-ı âlîleriyle işbu arzuhâl ve derkenâra nazar olundukda tasrîh olunduğu vech üzere Koçhisar Memlaha Mukāta‘ası malından almak üzere sâhib-i arzuhâl Ali b. Abdullah’ın kırk akçe vazîfesini mahmiye-i İslambol’da Bezzâz ve Abacılar Kethüdâsı İsmail mezbûr Ali için fevt oldu deyü çaldırıp bin yüz yetmiş sekiz senesi Zilhiccesi’nin yirmi sekizinci târîhinde kendi kethüdâlığı mukābili hazîne mânde etdirip ba‘dehû mezbûr Ali fevti gayr-ı vâki‘ olduğunu ihbâr ve vazîfe-i merkūme mâh-be-mâh mezbûr İsmail’in malından verilmek üzere yedine tuğrâlı fermân-ı âlîşân i‘tâ olunmuş iken şimdi mezbûr Kethüdâ İsmail’in hacc-ı şerîfde fevti şâyi‘ ve kethüdâlığı mahlûl olup mâh-be-mâh vazîfe-i mersûme mezbûr İsmail’in veresesinden tazmîn meşrû‘ olmayıp lâkin bu makūle hasm-ı hırfet kethüdâlıkları Enderûn-ı hümâyûnda ekmeği mukābili yâhud merhameten hırfetinin gayrına inâyet olunduğu emsâlinden olmağla mezbûr Ali’nin istid‘âsı vechi üzere zikr olunan kethüdâlık kendüye ihsân buyrulup eğer hırfeti bir âharı tevkîl murâd ederlerse vekîl-i mezbûr mâh-be-mâh vazîfesini vermek şartıyla yedine tuğrâlı emr-i âlîşân inâyet buyrulmak için bundan akdem sâdır olan emr-i âlîşân izzetlü reisülküttâb efendi i‘lâmıyla olduğuna binâen efendi-i mûmâ-ileyhe havâle buyrulmak bâbında emr ü fermân hazret-i men-lehü’l-emrindir. Fî 26 S sene 1180.