İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 251 Hüküm no: 253 Orijinal metin no: [114-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayyum Molla Mustafa’nın Fatıma’da olan alacağını tahsil ederek elindeki rehin eşyayı iade etmesi İbra, Ma‘rûz, Sâhib-i arzuhâlin hasmı Kayyûm Molla Mustafa meclis-i şer‘-i hatîrde zâtı mu‘arrefe sâhibe-i arzuhâl Fâtıma’dan bâ-temessük cihet-i karzdan iddi‘â eylediği beş yüz yirmi dokuz guruşun üç yüz otuz üç guruşu için mezbûre Fâtıma bilâ-devr ribâdır deyü edâdan imtinâ‘ etmekle mezbûre Fâtıma bâ-vesâtet-i Müslimîn mezbûr Molla Mustafa ile üç yüz yetmiş guruş üzerine sulh olup ve üç yüz yetmiş guruşu meclis-i şer‘-i şerîfde mezbûr Molla Mustafa’ya teslîm, meblağ-ı mezkûr mukābelesinde mezbûr Molla Mustafa yedine irhân eylediği bir çift zümrüd küpe ve iki karsak kürk ve bir şal kuşak ve sekiz ayetli altın ve bir la‘l yüzük ve bir elmaslı gerdânlık ve sîm buhurdan ve bir çift altın kuşak ve bir tek bileziği yedinden ahz u kabz edip irhân-ı mezkûreden Molla Mustafa yedinde alacak hakkı kalmadığını ikrâr etdikde ol dahi ziyâde yüz elli dokuz guruşa müte‘allıka da‘vâdan mezbûre Fâtıma’nın zimmetini ibrâ ve iskāt ve kat‘-ı münâza‘a eyledikleri rızâlarıyla tescîl olunduğu bi’l-iltimâs huzûr-ı âlîlerine i‘lâm olundu. Fî 26 S sene [11]80.