İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 253 Hüküm no: 255 Orijinal metin no: [115-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pertev Paşa Hanı’nın yıkılmış olan kısımlarının yangına dayanıklı bir şekilde inşa olunması Keşif Pertev Paşa Hanı Ma‘rûz, Uzunçarşı’da İbrahim Paşa kurbünde vâki‘ Pertev Paşa Hanı demekle ma‘rûf olup iki tarafı menâzil ve bir tarafı Sulu Han ve bir tarafı tarîk-i âm ile mahdûd pûşîdesi kiremit sakıflı Gürcü Yusuf Paşa Vakfı’ndan yirmi odası kârgîr ve mâ‘adâsı Pertev Paşa Vakfı’ndan ahşabdan yüz elli odalı hanın fevkānîsinde kârgîr tonozlu bir oda ve iki kenîf münhedim olup ve ahşabdan binaya mübâşeret olunduğu rü’yet olunmuş idi. Hâlâ ashâb-ı arzuhâl vakf-ı mezbûrun kāimmakām-ı mütevellîsi ve mürtezikası iltimâslarıyla vârid olan fermân-ı âlîlerine imtisâlen kıbel-i şer‘den Ali Efendi irsâl, ol dahi mi‘mâr hulefâsıyla mahâll-i mezkûra varıp tekrâr mu‘âyene eylediklerinde ke’l-evvel kârgîr binâya vakf-ı mezkûrdan müsâ‘ade olmamağla alâ-hâlihi terk olunursa tahtında olan kârgîrden odalar matar sebebiyle mutazarrır olacağı müte‘ayyen olmağla kāimmakām-ı mütevellîsi zikr olunan bir oda ve iki kenîfi ke’l-evvel üzeri kiremid pûşîdesi ve etrâfları dolma ve tuğla yapışdırma ve kirpi saçak ile kârgîr sûretinde binaya müsâ‘ade buyrulması istid‘âsında oldukda han-ı mezkûrun zikr olunan odalarında ve civârında sâkin olanlardan Tabîb Kırımî es-Seyyid Abdurrahman Efendi ve es-Seyyid el-Hâc Abdülkadir ve es-Seyyid el-Hâc Ahmed ve Bezzâzistânî el-Hâc Hüseyin ve el-Hâc İbrahim ve es-Seyyid Osman ve es-Seyyid Musa ve Mehmed Beşe ve İbrahim Çelebi ve Nasuh Çelebi mahâll-i mezkûr sûret-i mezkûrede binâ olunur ise harîkden masûn olup etrâfına zarârı yokdur deyü haber ve bu sûrette rızâ dâde olduklarını gelip inhâ eylediği ma‘lûm-ı devletleri buyruldukda emr ü fermân hazret-i men-lehü’l-emrindir. Fî 25 S sene [11]80.