İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 253 Hüküm no: 256 Orijinal metin no: [116-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Davud Paşa Vakfı’na satmış olduğu menzil hissesini terk etmeyen Havva Hatun’un menzilden zorla çıkarılması Horhor’da vâki‘ menzil Ma‘rûz, Nezâret-i dâ‘îlerinde olan evkāfdan Kara Davud Paşa vakfı’ndan Horhor kurbünde vâki‘ ma‘lûmü’l-hudûd menzilin sümünü arzuhâlde mezkûr Havva Hatun’un tasarrufunda seb‘a-i esmânı mahlûl ve taraf-ı vakfa âid olmağla menzil-i mezkûrda mahlûl olan seb‘a-i esmânı taraf-ı vakfa zabt etdirmeyip mecmû‘una vaz‘-ı yed etmekle vakf-ı mezkûr mütevellîsi sâhib-i arzuhâl el-Hâc Salih mezbûre Havva ile kādı-ı esbak Âtıf Mehmed Emin Efendi huzûrunda bin yüz yetmiş altı Recebi gurresi târîhinde murâfa‘a ve mezbûrenin menzil-i mezkûrda sümün hisseden gayrı hakkı olmadığı sâbit ve hisseye ta‘arruzdan men‘ olunup lâkin mezbûre şer‘-i şerîfe adem-i itâ‘at ve ta‘annüt ve temerrüdünden nâşî iştirâsına tâlib olanları menzil-i mezbûru rü’yetden men‘ ile bu vakte dek vakf-ı şerîfin menfa‘atini ta‘tîl eylediğine binâen tekrâr bu dâ‘îleri huzûrunda murâfa‘a olmağla taksîme râzıye olup kıbel-i şer‘-i şerîfden kâtib ve mi‘mâr halîfeleri ma‘rifetleriyle rü’yet ve misâha olundukda menzil-i mezkûrun mecmû‘u yedi yüz on dört guruş ve mezbûre Havva’nın hissesi seksen dokuz guruş ve bir rub‘ takvîm olunup lâkin kābil-i taksîm olmadığı zâhir oldukdan sonra mütevellî-i mezbûr mezbûre Havva’dan hisse-i menzili yedinden tahlîs için hissesinden yirmi guruş ziyâde yüz on guruş verdikde ol dahi mukābelesinde hissesini vakf-ı mezbûra ferâğ ve hissesine müte‘allıka âmme-i da‘vâdan mütevellî-i mezkûrun zimmetini ibrâ ve iskāt eylediği tescîl olunup bundan akdem huzûr-ı âlîlerine i‘lâm olunmuş idi. Hâlâ mezbûre Havva menzil-i mezkûru mütevellî-i mezbûra tahliye ve teslîm etmeyip bi-gayrı hakkın içinde sâkin ve taraf-ı vakıfdan âhara ferâğa mâni‘a olmağla mütevellî-i mezbûr ile bu def‘a murâfa‘alarında hisse-i mezkûremde gabin olmağla menzil-i mezkûrda olan hisseyi vermem deyü eylediği da‘vâsı şer‘an mesmû‘a olmayıp ve bir vechile şer‘-i şerîfe mutî‘a olmamağla mahsûs mübâşir ve imam-ı mahâlle ma‘rifetiyle ihrâç ve vakf-ı şerîfi ihyâ ve hükm-i şerî‘at-ı mutahharayı icrâ ile müsâb ve me’cûr buyrulmak bâbında emr-i âlî sudûruyla menzil-i mezkûru tahliye ve mütevellî-i mezbûra teslîm iktizâ eylediği bi’l-iltimâs huzûr-ı âlîlerine i‘lâm olundu. Fî 26 Safer sene [11]80.