İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 254 Hüküm no: 257 Orijinal metin no: [116-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yalıköy fırınına un tedarikinin Paşabahçe’deki fırından yapılması Yalıköyü’nde vâki‘ ekmekçi fırınına dakīk, Paşabahçesi nâm mahâlde olan değirmenden ta‘yîn Ma‘rûz, Beykoz kurbünde vâki‘ Yalıköyü’nde ekmekçi olan el-Hâc Mustafa meclis-i şer‘-i şerîfe gelip fırınımın dakīki Yeniköy’de vâki‘ Dimitri değirmeninden ta‘yîn olunup, lâkin bir seneden beri ta‘yîn olunan dakīki irsâl etmemekle mahâll-i mezkûrda olan ibâdullahın muzâyakasına ve fırınımın ta‘tîline bâ‘is olur deyü teşekkî etmekle sicill-i mahfûza nazar olundukda zikr olunan değirmen üç horos ile merkūm zimmî üzerinde mukayyed ve kapandan aldığı hissesinin altı keyli Yeniköy’de francalacı fırınına ve altı keyli dahi yine Yeniköy’de simidçi fırınına ve üç keyli Rumeli Hisarı’nda yine simidçi fırınına ve dokuz keyli mezbûr el-Hâc Mustafa fırınına ta‘yîn olunduğu tasrîh olunmağla merkūm Dimitri ihzâr-ı şer‘-i şerîf olunup istintâk olundukda değirmenimin âlât-ı lâzımesi kalîle olmağla mezbûr el-Hâc Mustafa’nın fırınına her yevm ta‘yını yetişdiremem deyü izhâr-ı acz ve rızâsıyla terk etmekle ekmekçi ve uncu ustaları dahi ihzâr ve ma‘rifetleriyle husûs-ı mezkûr rü’yet olundukda Paşabahçesi’nde Evkāf-ı hümâyûn’dan bir fırın ile dört horos değirmen mutasarrıfları Malkos ve Agob zimmîler mezkûr fırının ta‘yınını yetişdirip ibâdullaha muzâyaka çekdirmemek üzere ta‘ahhüd etmeleriyle ta‘ahhüdleri tescîl olunmağla merkūm Dimitri’nin izhâr-ı acz ve terkiyle mezkûr Yalıköyü fırınının dakīki merkūmânın değirmenlerinden ta‘yîn olunduğu mahâlline kayd ve şerh verilmek bâbında emr ü fermân hazret-i men-lehü’l-emrindir.