İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 255 Hüküm no: 258 Orijinal metin no: [117-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev Paşa Vakfı’ndan Vasil ve Panayot’un kiralamış oldukları dükkânı boşaltarak Yako ve İlyaz’a teslim etmeleri Gedik meşrû‘ olmamağla kürkçü dükkânından çıkıp teslîme tenbîh Ma‘rûz, Çukacılar içinde vâki‘ bir tarafdan kürkçü dükkânı ve bir tarafdan aynacı dükkânı ve bir tarafdan Kaliçeciler Hanı ve tarîk-i âm ile mahdûd üç kepenk dükkânın Hüsrev Kethüdâ Vakfı’ndan bâ-temessük rub‘u Yako v. Paşova ve selâse-i erbâ‘ı İlyaz v. Hayim üzerinde olmağla arzuhâl eden merkūm İlyaz kendi tarafından asâleten ve şerîki merkūm Yako tarafından vekâleti müsbite vekîl olmağla vekâleten meclis-i şer‘-i hatîrde derûn-ı arzuhâlde isimleri mezkûr olup dükkân-ı mezkûrda şerîkleriyle ma‘an müşâhereten müstecirler olan kürkçü tâifesinden Vasil ve Panayot nâm zimmîler ile terâfu‘larında ben dükkân-ı merkūmda sâkin olup şerîkim ile çukacılık etmek murâd etmemle asâleten ve vekâleten işbu şehr-i Saferi’l-hayrın âhirinde merkūmân Vasil ve Panayot ile fesh-i akd-i icâre edip dükkân-ı merkūmu tahliye ve bana teslîm etmeleri matlûbumdur deyü da‘vâ etdikde merkūmân Vasil ve Panayot cevâblarında biz dükkân-ı merkūmu malımızdan iki bin guruş sarf edip gedik etdirmemiz ile müddet-i medîdeden beri şerîklerimiz ile dükkân-ı merkūm altı gedik olup ve kürkçüler dükkânları gedikleri eşyâ ile mu‘teber olmayıp hâlî gedik olmağla âhar mahâlle nakil olunmamak üzere bizim Rumca temessüklerimiz olduğundan gayrı esnâfımızın senedleri dahi olmağla dükkân-ı merkūm çukacı dükkânı olmaz deyüp dükkân-ı merkūmu tahliye ve teslîmden imtinâ‘ edip ve kürkçü gediklerinin adem-i nakline sened ibrâz edememekle müdde‘î-i merkūmun ibrâz eylediği fetvâ-yı şerîfeye nazar olundukda “Zeyd dükkânını aded-i şuhûr beyan olunmadın ayda şu kadar akçeye Amr’a icâr ve teslîm edip Amr dahi dükkânı birkaç ay zabt etdikden sonra Zeyd âhir-i şehirde icâreyi feshedip dükkânı zabt murâd etdikde Amr ben dükkâna rağbet verip gedik etmiş idim, öyle olucak yine ben zabt ederim deyü Zeyd’i men‘a kādir” olmaz deyü buyrulmağın fetvâ-yı şerîfe mûcebince merkūmânın gedik iddi‘âsı hilâf-ı şer‘-i şerîf olup ve gediklerinin adem-i nakline fermân-ı âlîşân dahi ibrâz edememekle dükkân-ı merkūmu âhir-i şehirde tahliye ve mersûm İlyaz’a şer‘an teslîm olunmak iktizâ eylediği bi’l-iltimâs huzûr-ı âlîlerine i‘lâm olundu. Fî 27 S sene [11]80.