İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 256 Hüküm no: 259 Orijinal metin no: [117-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Ali’nin ortağı Hamza Efendi’yle arasındaki cariye davası Ta‘zîr-i i‘lâm, Ma‘rûz, Zeyrek kurbünde sâkine sâhib-i arzuhâl Hanife’nin zevci Halil b. Ali meclis-i şer‘-i şerîfe ihzâr etdirdiği derûn-ı arzuhâlde mezkûr Hâfız-ı kütüb Hamza Efendi b. Hüseyin mahzarında mudârabe tarîkiyle zevcem işbu meclisde hâzıra mezbûre Hanife bana altı yüz guruş verip mezbûr Hamza Efendi dahi sekiz yüz yetmiş guruş vermekle, ben dahi tahlît edip ve Karadeniz sevâhilinde meblağ-ı mezkûr ile bir mikdâr yağ ve işbu meclisde hâzıra Gürciyetü’l-asl Mahbûbe nâm câriye iştirâ ve menzilime getirip âhara bey‘ esnâsında mezbûr Hamza Efendi câriye-i mezkûre benim malımdan iştirâ olunmağla alıp ben bey‘ ederim deyüp altı gün mukaddem ben menzilimde yoğiken iznimsiz menzilime duhûl ve câriye-i mezkûreyi almağla bu sûretde hakk-ı bey‘ benim olduğu için câriye-i mezkûreyi taleb ederim deyü da‘vâ, mezbûr Hamza Efendi cevâbında hâl minvâl-i muharrer üzere olduğunu ikrâr lâkin, işbu yedimde olan fetvâ-yı şerîfe mantûkunca mezbûr Halil câriye-i mezkûreyi âhara bey‘den ibâ ve kendi istifrâş murâd etmekle âhara bey‘e cebr olunsun dedikde mezbûr Halil Bey’den ibâ ve istifrâşını inkârından mâ‘adâ mezbûr Hamza Efendi’yi te’mîn için câriye-i mezkûreyi âhara bey‘e ve adem-i izâ‘atına hâzirûn bi’l-meclis olan ammisi el-Hâc Ali b. İbrahim ve Manav Ali b. Abdullah nâm kimesneleri kefil verdikde ol dahi râzı olup câriye-i mezbûreyi bey‘ için mezbûr Halil’e teslîm edip lâkin mezbûr Hamza Efendi bilâ-izn câriye-i mezbûreyi almak için mezbûr Halil’in haremine duhûl ve sû-i edebi muktezâsınca mezbûr Halil’in talebiyle mezbûr Hamza Efendi’ye vech-i şer‘î ta‘zîr olunup bu minvâl üzere kat‘-ı nizâ‘ eyledikleri mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 27 Safer sene 1180.