İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 257 Hüküm no: 260 Orijinal metin no: [118-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karacasu, Buldan ve Denizli tüccarlarının İstanbul’a getirmiş oldukları bogasinin nizami ölçülerinden eksik olduğu Bogasici esnâfının nizâmı Ma‘rûz, Âsitâne’de bogasici esnâfının kethüdâları es-Seyyid Ahmed ve Yiğitbaşıları Mehmed ve ihtiyârlarından es-Seyyid Mehmed ve el-Hâc Ali ve es-Seyyid İbrahim ve el-Hâc Süleyman ve sâirleri meclis-i şer‘-i şerîfe ihzâr eyledikleri Karacasu bazergânlarından el-Hâc İbrahim ve el-Hâc Mehmed ve Habib ve Ömer ve Hüseyin ve Buldan bazergânlarından diğer el-Hâc İbrahim ve el-Hâc Mehmed ve el-Hâc Süleyman ve diğer Süleyman ve Denizli bazergânlarından es-Seyyid Abdurrahman ve diğer el-Hâc Mehmed ve es-Seyyid Mehmed ile terâfu‘larında yedimizde olan fermân-ı âlîşân mûcebince Karacasu’da nesc olunan boyalı bogasi arzen bir zirâ‘ ve bir rub‘ ve tûlen sekiz zirâ‘ orta ta‘bîr olunup ve Buldan bogasisinin kezâlik arzen bir zirâ‘ ve bir rub‘ ve tûlen sekiz zirâ‘ ve Denizli bogasisinin arzen bir zirâ‘ iki rub‘ ve tûlen kezalik sekiz zirâ‘ nesc olunup ve kalb ve redî olmamak için noksân işlenmemek üzere taht-ı zâbıtaya ifrâğ ve bundan noksân işlenen bogasileri Âsitâne’ye getirip ecânib yediyle hufyeten bey‘ edenler men‘ ü def‘ ve te’dîb olunmak fermân-ı âlîşânın şurûtundan iken zikr olunan bazergânların bu def‘a getirdikleri bogasiler noksân olmağla te’dîb ve men‘ olunmaları matlûbumuzdur deyü getirdikleri bogasileri ibrâz etdiklerinde tevzî‘ olunup Karacasu bogasisi fermân-ı âlîşânda tasrîh olunan mikdârdan arzen bir rub‘ ve tûlen dahi bir zirâ‘ ve Buldan bogasısı arzen bir rub‘ ve tûlen altı rub‘ ve Denizli bogasısı arzen bir rub‘ ve tûlen nısf zirâ‘ noksân gelip ve zikr olunan bogasileri hilâf-ı fermân-ı âlîşân Âsitâne’ye getirmeğe cesâret eylediklerini ikrâr u i‘tirâf etmekle fermân-ı âlîşân mûcebince mezbûrûn taraf-ı âlîlerinden te’dîb ve men‘ için i‘lâmıyla huzûr-ı âlîlerine irsâl olunduğu arz olundu. Fî 28 Safer sene [11]80.