İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 257 Hüküm no: 261 Orijinal metin no: [118-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müftü Hamamı Fırıncısı Hüseyin’in kendisine tahsis olunan yer haricinde ekmek satmamaya taahhütte bulunması Ekmekçi iskemlesi Ma‘rûz, Küçükmustafapaşa Fırını ekmekçisi Bogos meclis-i şer‘-i hatîrde Müftü Hamâmı Fırını ekmekçisi Hüseyin’den işbu meclisde hâzır İlya nâm zimmînin bakkāl olduğu dükkân benim fırınımın iskemlesi iken mezbûr Hüseyin dükkân-ı mezkûr ile fırınım kurbünde helvacı olan yine işbu meclisde hâzır olan es-Seyyid İsmail’in helvacı dükkânına fırınından ekmek irsâl ve hilâf-ı fermân iki iskemle ihdâs murâd etmekle nizâm-ı kadîmimizin ihtilâline bâ‘is olur deyü inhâ etdikde mezbûr Hüseyin dahi fî-mâ-ba‘d mugāyir-i nizâm zikr olunan mahâllere fırınından iskemle irâdesiyle ekmek irsâl etmemek üzere ba‘de’t-ta‘ahhüd mezbûr es-Seyyid İsmail ile mersûm İlya dahi kendilerine iktizâ eden ekmeği rızâlarıyla merkūm Bogos’un fırınından almak üzere beynleri bulunup kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 28 S sene [11]80.