İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 258 Hüküm no: 262 Orijinal metin no: [118-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya Kapısı dışında depremden zarar gören Hacı Faik Vakfı’na ait camide keşif yapılması Samatya hâricinde vâki‘ câmi‘i keşif Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz es-Seyyid Halil Efendi dâ‘îleri ve Haremeyn-i muhteremeyn müfettişi müderrisîn-i kirâmdan Ahmed Necib Efendi tarafından mürsel müderrisînden Mehmed Samih Efendi, Hâssa mi‘mârlarından Mustafa ve Abdullah Halîfeler ve sâir ümenâ-yı şer‘le Samatya Kapısı hâricinde vâki‘ arsası Ayasofya-i kebîr Vakfı’ndan senevî yüz akçe mukāta‘alı ve binâsı el-Hâc Faik Vakfı’ndan câmi‘-i şerîf ve ittisâlinde ve tahtında kâin dekâkîn üzerlerine varıp mu‘âyene eylediklerinde câmi‘-i şerîf-i mezbûr sebkat eden zelzeleden inhidâma mâil olmağla mütevellîsi Molla İbrahim b. Abdi bi’l-izni’ş-şer‘î câmi‘-i mezkûru hedm ve müceddeden binaya mübâşereti esnâsında hudûdu dâhilinde ve tahtında olan dekâkîn arsaları misâha olundukda câmi‘-i şerîf tahtında olup mürûr olunan tarîkden mâ‘adâ terbî‘an yüz kırk dört buçuk zirâ‘ olup ve mevcûd taş nerdübanı önünde olup yine câmi‘-i mezkûrun sakfı tahtında ve bi’r-i mâ ve musluğu mâbeyninde icâre-i vâhide ile icâr olunan terbî‘an yirmi altı zirâ‘ ve altı parmak arsa üzerine [119] mebnâ iki kepenk eskici dükkânları mahâlline mütevellî-i merkūm câmi‘-i şerîf nerdübanını ve tarafeynine zikr olunan dükkânları binâ murâd eyledikde Ayasofya-i kebîr Vakfı mütevellîsi Abdullah Efendi taraflarından vekîl-i müsecceli Molla Mustafa mârrü’z-zikr nerdüban önünde olan terbî‘an yirmi altı zirâ‘ ve altı parmak mahâl tarîk-i âm arsasındandır deyü da‘vâya tasaddî eyledikde arsa-i mezkûre kadîmden el-Hâc Faik Vakfı’ndan tasarruf olunageldiğini ve câmi‘-i mezkûrun mukāta‘a-i kadîmeli hudûdu dâhilinde olduğunu kurb ve civârında olan dekâkîn ashâbı ve ahâlî-i iskele ve mahâllâtdan mastûrü’l-esâmi yüz elli neferden mütecâviz kimesneler haber verdiklerinden sonra el-Hâc Faik Vakfı mütevellîsi arsa-i mezkûrenin tekmîl-i mukāta‘ası için taraf-ı vakıfdan Ayasofya-i kebîr Vakfı’na mukāta‘a-i kadîmesi üzerine senevî yüz akçe mukāta‘a dahi nef‘an li’l-vakf zam eylediği huzûr-ı âlîlerine i‘lâm olundu. Fî 25 min-Safer sene [11]80.