İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 259 Hüküm no: 263 Orijinal metin no: [119-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Bey v. Yavuzer Vakfı Mütevelli Kaymakamı Mustafa’nın, Çorum’daki Eşen Paşa evladından Hasan b. Mehmed Vakfı’nın mütevellisi İbrahim ile olan davasının Çorum’da görüşülmesi Sinan Bey Vakfı’nın mahâlline irsâli için emir iltimâsı Ma‘rûz, Mahmiye-i İstanbul’da nezâret-i dâ‘îlerinde olan evkāfdan Kapan-ı dakīk kurbünde Sinan Bey v. Yavuzer Vakfı’nın Kāimmakām-i Mütevellîsi Mustafa’nın Çorum sancağında Karahisar-ı Demirli [Mecidözü] nâhiyesinde vâki‘ Eşen Paşa evlâdından Hasan b. Mehmed Vakfı’nın evlâdiyet üzere mütevellîsi olan sâhib-i arzuhâl İbrahim ile nâhiye-i mezbûrede Mikada ma‘a Çıkrıkçılar karyesine ve Kızılkır ve Kuyucak ve Taşağıl ve Karavdar ve Kıroğlu mezra‘alarına müte‘allık nizâ‘ları olup ve Kıroğlu cesîm karye olup ve mezbûr İbrahim inkâr edip zahr-ı arzuhâlde izzetlü Reisülküttâb Efendi ve Defter Emîni Efendi i‘lâmlarında ve Defterhâne-i âmire kuyûdâtı mûceblerince zikr olunan kurâ ve mezâri‘ zikr ü beyan ve tarafeynin arazisi tasrîh ve tefrîk olunup lâkin husûs-ı mezkûr arazi da‘vâsı olup ve mezbûr İbrahim’in dahi Çorum a‘yânından avenesi olmağla bundan akdem Çorum kādısı huzûrunda murâfa‘a esnâsında mezbûr İbrahim’in akrabâsından Ömer nâm kimesne zecr ü men‘ ve hançer ile darb ü cerh etmekle ihkāk-ı hak mümkün olmadığını kāimmakām-ı mütevellî-i mezbûr inhâ ve bu tarafdan bir müvellâ ta‘yîn olunmasını iltimâs edip lâkin mahâll-i mezkûr mesâfe-i ba‘îde olmağla mahâll-i mezkûra karîb olan Sivas kādısı husûs-ı mezkûra mütevellî ta‘yîn buyrulup ve mezbûr İbrahim Çavuş ma‘rifetiyle Sivas’a irsâl ve tarafeyn gadr ve himâyeden sıyânet ve gereği gibi tarafeynin arazisi sûret-i Defter-i hâkānî mantûkunca mütebeyyin ve tefrîk olunarak ve madde-i mezkûrede alâkaları olmayanlar karışmamak için eyâlet vâlisi tarafından mübâşir ma‘rifetiyle husûs-ı mezkûr mahâllinde vech-i şer‘î üzere istimâ‘ ve fasl ü hasm olunmak için izzetlü reis efendi i‘lâmındaki tafsîl derc olunarak emr-i âlîşân ihsân buyrulmak bâbında emr ü fermân hazret-i veliyyü’l-emrindir. Fî-selhi Safer sene 1180.