İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 259 Hüküm no: 264 Orijinal metin no: [119-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanbolu ve Kızılağaç kazaları cizyedarı Debrelizade Hasan’ın Karabet v. Kirkor’un zimmetini ibra etmesi Edirne Cizyesi malından hukūk, 4100 guruş, Ma‘rûz, Yetmiş dokuz senesinde Edirne cizyedârı olan Debrelizâde Hasan Ağa ve diğer Hasan Ağa taraflarından nevâhî-i Yanbolu ve Kızılağaç kazâlarını der-uhde eden sâhib-i arzuhâl Mehmed meclis-i şer‘-i hatîrde arzuhâlde merkūmü’l-ism Sarrâf hizmetkârı Karabet v. Kirkor muvâcehesinde sene-i mezbûre Rebî‘ülâhiri’nin on yedinci günü Edirne’de mezbûr Debrelizâde Hasan Ağa’nın menzilinde mezbûr Hasan Ağa tarafından der-uhde ve cem‘ine memûr olduğum mâl-ı cizyeden merkūm Karabet yedine dört bin yüz guruş verip ve mezbûr Hasan Ağa’ya teslîm eyle deyü emir etmemle merkūm Karabet meblağ-ı merkūm dört bin yüz guruşu mezbûr Hasan Ağa’ya teslîm etmeyip hâlâ yedinde kalmağla taleb ederim deyü da‘vâ ve mezbûr Karabet cevâbında müdde‘î-i mezbûrdan târîh-i mezkûrda ve mahâll-i merkūmda dört bin yüz guruş kabzını ikrâr lâkin emri üzere mezbûr Hasan Ağa’ya tamâmen teslîm eyledim deyü def‘ etmekle ihtiyâten mezbûr Hasan Ağa ihzâr olunup istintâk olundukda meblağ-ı mezkûru merkūm Karabet’den ahzını ikrâr ve meblağ-ı mezkûru mezbûr Mehmed ile cizye malından kabzına tarafımdan memûr olduğunu hesâbımıza mahsûb eyledim demekle müdde‘î-i mezbûr Mehmed merkūm Hasan Ağa ile muhâsebelerine havâle olunmağla meblağ-ı merkūm dört bin yüz guruşu için merkū[m Kara]bet’in yed ve zimmeti berî olup şer‘an nesne lâzım gelmediği bi’l-iltimâs huzûr-ı âlîlerine i‘lâm olundu. Fî-selh-i Safer sene 1180.