İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 262 Hüküm no: 267 Orijinal metin no: [120-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Paşazade Akif Mehmed Efendi’nin mülk menzillerinin Malcızade Hacı Mehmed Vakfı’ndan olan menziller ile istibdal olunması İstibdâl fermânı Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u i‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtass bi-mezîdi inâyeti’l-meliki’l-mu‘în mevlânâ İslambol kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki kıdvetü’l-emâcid ve’l-a‘yân hâlâ Dîvân-ı hümâyûn’umda teşrîfâtî olan Ebubekir Paşazâde Akif Mehmed -zîde mecdühû-nun mahmiye-i İslambol’da Kocamustafapaşa Câmi‘-i şerîfi kurbünde Hâce Hatun mahâllesinde vâki‘ Malcızâde el-Hâc Mehmed Vakfı’ndan beş akçe icâre-i müeccele ile tasarrufunda olan dört bâb menzil ile ma‘lûmü’l-mikdâr arsasını Sancakdâr Hayreddin ve Duhânîzâde ve Arabacı Bâyezid ve Tarsus mahâllelerinde vâki‘ mâlik olduğu dört bâb menâzil ile istibdâl murâd edip menâzil-i mevkūfe ile menâzil-i memlûke hâssa mi‘mâr ma‘rifetiyle mütevellî-i vakıf muvâcehesinde keşif ve tahmîn ü takvîm ve şerâit-i istibdâl mevcûde ise hakīkat-i hâl Der-aliyye’me arz olunmak istid‘âsıyla arzuhâli bâlâsına sâdır olan fermân-ı âlîşâna imtisâlen kıbel-i şer‘-i şerîfden mi‘mâr hulefâsın ma‘rifetleriyle menâzil-i mezkûre rü’yet [121] ve misâha ve takvîm olundukda mülk olan menzille menâzil-i mevkūfeden cevdet ve vüs‘at ve rağbet cihetlerinden ekser ve evfer olup min-külli’l-vücûh şerâit-i istibdâl mevcûde ve istibdâl olunduğu sûretde taraf-ı vakfa nâfi‘ olduğu zâhir ve müte‘ayyin olmağla sıhhat-i istibdâl için zikr olunan vakıf menâzilin emlâk-ı mezkûre ile istibdâline mütevellî-i mezbûra izni müş‘ir yedine tuğrâlı emr-i âlîşânım ihsân olunmasın sen ki mevlânâ-yı mûmâ-ileyh Neylîzâde Mehmed Hamid -zîdet fezâiluhû-sun i‘lâm etmenle şurût-ı istibdâl mevcûd ise i‘lâmın mûcebince istibdâl olunmak bâbında fermân-ı âlîşânım sâdır olmuşdur. Buyurdum ki, hükm-i şerîfim vusûl buldukda bu bâbda sâdır olan emrim üzere amel, dahi sen ki mevlânâ-yı mûmâ-ileyhsin zikr olunan vakıf menâzilden mülk olan menâzil-i mezkûre misâhaten ve kıymeten ve rağbeten ezyed ve evfer olup istibdâli vakfa enfa‘ ve evlâ olduğun i‘lâm etmenle istibdâli tecvîz eden fukahâ-yı zevi’l-ibtihâcın kavilleri üzere mülk menâzil-i mezbûre [vakıf] ve vakıf menâzil-i merkūme mülk olmak üzere ve vakf-ı evvelinin şurûtu vakf-ı sânîde icrâ olunmak için istibdâl edip tarafeyne hüccet veresin, şöyle bilesin, alâmet-i şerîfe i‘timâd kılasın. Tahrîren fî-evâil-i Rebî‘i’l-evvel sene semânîn ve mi’e ve elf.