İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 263 Hüküm no: 268 Orijinal metin no: [121-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Paşazade Akif Mehmed Efendi’nin mülk menzillerinin Malcızade Hacı Mehmed Vakfı’ndan olan menziller ile istibdal olunması İstibdâl i‘lâmı Der-i devlet-mekîne arz-ı dâ‘î-i kemîne oldur ki, Hâlâ Devlet-i aliyye’de teşrîfâtî olan Ebubekir Paşazâde Akif Mehmed Bey Efendi’nin mahmiye-i İslambol’da Kocamustafa Câmi‘-i şerîfi kurbünde Hâce Hatun mahâllesinde vâki‘ Malcızâde el-Hâc Mehmed Vakfı’ndan beş akçe icâre-i müeccele ile tasarrufunda olan dört bâb menzil ile ma‘lûmü’l-mikdâr arsasını Sancakdâr Hayreddin ve Duhânîzâde ve Arabacı Bâyezid ve Tarsusî mahâllelerinde vâki‘ mâlik olduğu dört bâb menâzil ile istibdâl murâd edip menâzil-i mevkūfe ile menâzil-i memlûke mi‘mâr ağa ma‘rifetiyle mütevellî-i vakıf muvâcehesinde keşif ve tahmîn ü takvîm ve şerâit-i istibdâl mevcûde ise hakīkat-i hâl pâye-i serîr-i a‘lâya arz olunmak istid‘âsıyla arzuhâli bâlâsına sâdır olan fermân-ı âlîye imtisâlen kıbel-i şer‘-i şerîfden mi‘mâr Ağa hulefâsı ma‘rifetleriyle menâzil-i mezkûre rü’yet ve misâha ve takvîm olundukda mülk olan menâzil, menâzil-i mevkūfeden cevdet ve vüs‘at ve rağbet cihetlerinden ekser ve evfer olup min-külli’l-vücûh şerâit-i istibdâl mevcûde [ve] istibdâl olunduğu sûretde taraf-ı vakfa nâfi‘ olduğu zâhir ve müte‘ayyin olmağla sıhhat-i istibdâl için zikr olunan vakıf menâzilin emlâk-ı mezkûre ile istibdâline mütevellî-i mezbûra izn-i sultânî erzânî buyrulup yedine tuğrâ-yı garrâ ile mu‘anven emr-i âlîşân ihsân buyrulmak ricâsına pâye-i serîr-i a‘lâya arz olundu. Fî 24 S sene [11]80.