İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 264 Hüküm no: 270 Orijinal metin no: [122-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan’da depremde zarar gören Örücüler çarşısı sokak kemerleri ve tavanının yeniden inşası Mercan sûkunun kemerleri mîrîden binâ olunmasını ricâ ederler. Ma‘rûz, Mercan Câmi‘-i şerîfi kurbünde vâki‘ Örücüler çarşısı ahâlîsi çarşı-yı mezkûrun sokağı vâsi‘ ve kemerleri kebîr olmağla kârgîr binâ olunması müddet-i medîdeye muhtâc olup nice zamân kâr ü kisbden mu‘attal olmamıza bâ‘is olur deyü çarşı-yı mezkûrun sebkat eden zelzeleden münhedim olan sokak kemerleri sarrâfçılar ve mûytâblar çarşısı kemerleri misillü ahşabdan binâsı inayet buyrulmak istid‘âsıyla arzuhâllerinde sâdır olan fermân-ı âlîye imtisâlen keşif nâibimiz müderrisîn-i kirâmdan es-Seyyid Halil Efendi sa‘âdetlü Yeniçeri Ağası tarafından Yazıcı Mustafa Efendi ile mahâll-i memûra varıp hâlâ çarşı binâsı emîni efendi ve mi‘mâr ağa tarafından Kâtib Mehmed Emin Halîfe ma‘rifetleriyle mu‘âyene eylediklerinde Mercan Kolluğu tarafında mevcûd sokak kemerlerinin ikinci kavisinden Astarcılar Hanı köşesine gelince mi‘mâr-ı mezkûr misâhasıyla tûlen yüz kırk dört ve devren on bir buçuk zirâ‘ münhedim olan kemerler mahâlline bi-iznillâhi te‘âlâ harîkden masûn olmak için iki taraf dükkânları kârgîr ve kemerleri üstüne kifâyet mikdârı duvar binâ ve duvarlar arasına iktizâsına göre ziyâ ahzı için havâle camları vaz‘ ve asıl sokak üstü ahşabdan pûşîde ve derûnu Bağdâdî tavan ve üstü horasan ve kireç ile kalemkârî binâ buyrulur ise zamân-ı kalîlde husûl-pezîr ve tahtında emn ü rahat ile devâm-ı ömr ü devlet-i hazret-i cihândârîye muvâzabet ederiz deyü vech-i meşrûh üzere binâ olunmasını istid‘â eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 2 Rebî‘ülevvel sene 1180.