İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 269 Hüküm no: 279 Orijinal metin no: [125-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Matyoz’un Panayot v. Hıristo aleyhindeki alacak davasından men olunması Men‘ Ma‘rûz, Kumkapı’da bakkāl Matyoz v. Tanaş mahmiye-i İstanbul’da meclis-i şer‘-i hatîrde Panayot v. Hıristo muvâcehesinde merkūm Panayot’u bundan akdem dükkânıma ikāmet eylediğimde ol dahi dükkânımda mevcûd malımdan iki yüz guruş kıymetli eşyâmı bi-gayrı hakkın ahz ve kendi umûruna sarfla istihlâk etmekle taleb ederim deyü da‘vâ ve merkūm Panayot dahi cevâbında eşyâ-yı mezkûreyi ahz ve istihlâkini ikrâr lâkin yetmiş dokuz Muharremi’nin onuncu günü Pazarbaşı Odası’nda müdde‘î-i merkūm Matyoz ile hesâb gördüğümüzde eşyâ-yı merkūme için ben merkūma malımdan yüz yetmiş guruş verdiğimde ol dahi yüz yetmiş guruşu ahz u kabz ve eşyâ-yı mezkûreye müte‘allıka da‘vâdan benim zimmetimi ibrâ ve iskāt etmiş idi deyü ba‘de’d-def‘ ve’l-inkâr mesfûr Panayot def‘-i meşrûhunu lede’t-tezkiye beynlerinde udûlden oldukları Müslimîn ihbârlarıyla müte‘ayyin olan yine Kumkapı’da mütemekkin Mardıros v. Artin ve Irgadpazarı’nda Bakkāl Piço v. Yorgi nâm zimmîler şehâdetleriyle isbât etmeğin mûcebiyle müdde‘î-i merkūm Matyoz husûs-ı merkūm için bi-gayrı hakkın şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 5 Rebî‘ülevvel sene 1180