İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 274 Hüküm no: 287 Orijinal metin no: [128-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cidde tüccarından Mehmed b. Abdülkadir’in, Mısır halkından Diyarbakırlı olarak bilinen Mustafa aleyhindeki alacak iddiasından men olunması Yevm-i mezbûrda İskenderiye’de olduğunu tevâtüren isbât Ma‘rûz, Cidde tüccârından olup Rikâb-ı müstetâba arzuhâl eden es-Seyyid Mehmed b. Abdülkadir Çarşamba günü arz odasında huzûr-ı âlîlerinde ma‘kūd meclis-i şer‘-i münîrde Mısır ahâlîsinden olup Diyarbekirli demekle ma‘rûf arzuhâlde mezkûr el-Hâc Mustafa b. Receb mahzarında mezbûr el-Hâc Mustafa yetmiş dokuz Şa‘bân-ı şerîfi’nin onuncu günü Mısır’da Cafer Ağa vekâlesinde vâki‘ kilidli mahzenimde mahfûz her ferdesi yevm-i mezkûrda belde-i merkūmede yüz altmış guruşdan iki bin beşyüz altmış guruş kıymetli on altı ferde kahve ile ve her vakiyesi kezâlik birer buçuk guruş kıymetli altmış vakiye fil dişimi bi-gayrı hakkın ahz ü gasb ve istihlâk edip hattâ mezbûr el-Hâc Mustafa Âsitâne’ye geldikden sonra işbu Saferi’l-hayrın onuncu günü keresteciler içinde bakkāl dükkânında mutâlebe eylediğimde beni ifşâ etme deyü bana iki bin sekiz yüz on guruş verecek olmağla eşyâ-yı mezkûrenin vech-i meşrûh üzere yevm-i gasbda belde-i mezkûrede olan kıymetini hâlâ taleb ederim deyü da‘vâ ve mezbûr el-Hâc Mustafa cevâbında eşyâ-yı mezkûreyi ahz ü gasbını inkârından mâ‘adâ sene-i mezbûre Recebi’nin on dokuzuncu günü Mısır’dan çıkıp müdde‘î-i mezbûrun iddi‘âsı üzere yevm-i gasbı olan Şa‘bân-ı şerîfin onuncu günü İskenderiye’de mevcûd olduğunu yevm-i mezkûrda İskenderiye’de bulunan Mısır ve İskenderiye ve İslambol tüccârından ve kalyon kapudanları ve neferâtından el-Hâc Osman b. el-Hâc Mustafa ve İbrahim b. İbrahim ve Reşidli Haffâf Ali b. Mehmed ve Cevher b. Abdullah ve Osman b. Süleyman ve Sahtiyancı el-Hâc Ali b. Abdullah ve es-Seyyid Hüseyin b. Mustafa ve el-Hâc Ali b. Hasan ve el-Hâc Yusuf kapudan b. el-Hâc Karayim ve Trablusî Ali b. Mehmed ve Malatyalı el-Hâc Mehmed b. Hasan ve el-Hâc Ahmed b. Ali ve Mehmed b. Abdullah ve Mehmed b. Yusuf ve Ahıskalı el-Hâc Süleyman b. el-Hâc Mustafa ve Zağferanborlulu Mustafa b. Mehmed ve Molla Abdullah b. Abdullah ve Hoca Ömer b. Süleyman İstanbullu Mustafa b. Abdullah ve İzmirli el-Hâc Mustafa b. İsmail ve Taşköprülü Osman b. Hasan ve Hoca Ali b. Hamza ve Rodosî Halil b. Ali ve Hoca Mustafa b. Mehmed ve Tophaneli Mehmed b. Abdullah ve Ahıskalı Alemdar İsmail b. Hüseyin ve Hasan b. el-Hâc Ali ve Bursalı el-Hâc İbrahim b. Nurullah ve Malatyalı es-Seyyid Kasım Odabaşı b. el-Hâc Hüseyin ve Mısırlı el-Hâc Ali b. el-Hâc Osman nâm otuz nefer kimesneler mezbûr es-Seyyid Mehmed’in muvâcehesinde şehâdet etdiklerinden sonra yine kalyon kapudanı ve neferâtından ve İskenderiye tüccârından el-Hâc Ahmed Kapudan b. Mustafa ve Başreis Hüseyin b. Mustafa ve İskenderiyeli es-Seyyid Hasan b. Ali ve Dümencibaşı Alâiyeli Abdülkerim b. Ahmed ve Topçubaşı İstanköylü el-Hâc Mehmed b. Hüseyin ve Gemi Hocası Mustafa b. Ahmed ve İskenderiyeli Hasan b. el-Hâc Ali ve Mısırlı el-Hâc Mehmed b. Ali ve İskenderiyeli Halil b. İbrahim ve Harputî es-Seyyid Abdullah b. Halil ve İskenderiyeli es-Seyyid Süleyman b. Salih nâm onbir nefer kimesneler dahi alâ-tarîkı’ş-şehâde haber vermeleriyle mezbûrûnun kizbi üzerine tevâtieleri müsteb‘ad olmağla hadd-i tevâtüre bâliğ olmağın müdde‘î-i mezbûr es-Seyyid Mehmed husûs-ı mezkûr için bi-gayrı vech-i şer‘î mu‘ârazadan men‘ olduğu bi’l-iltimâs huzûr-ı âlîlerine i‘lâm olundu. Fî 8 Rebî‘ülevvel sene [11]80.