İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 276 Hüküm no: 290 Orijinal metin no: [129-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abacılar Kethüdası İsmail’in yerine Yakub b. Osman’ın tayin olunması Abacılar Kethüdâlığı Ma‘rûz, Sâdır olan fermân-ı âlîlerine imtisalen işbu arzuhâl ve derkenâra nazar olundukda bâ-berat-ı âlîşân mahmiye-i İslambol’da bezzâz ve abacılar bâ-mukābele hazîne-mânde kethüdâsı olan İsmail b. Ali tarîk-i hacc-ı şerîfde fevt olmağla Ali b. Abdullah nâm kimesne zuhûr ve mezbûr İsmail için benim Koçhisar memlahası malından olmak üzere berat-ı âlîşân ile mutasarrıf olduğumuz kırk akçe vazîfem çaldırıp ve kethüdâlığı mukābili hazîne-mânde etdirmekle vazîfe-i merkūme mâh-be-ma[h] malından vermek üzere arzuhâliyle fermân-ı âlîşân sâdır olmağla mezbûr Ali vazîfe-i mersûmesi mezbûr İsmail’in fevtinden sonra veresesinden almak hilâf-ı şer‘dir deyü kethüdâlığına tâlib olmağla bundan akdem i‘lâm olunup izzetlü Reisülküttâb Efendi’ye havâle olunmağla efendi-i mûmâ-ileyh dahi kethüdâlık-ı mezbûr Ali’ye tevcîh buyrulmasını telhîs etmiş idi. Hâlâ mezbûr Ali meclis-i şer‘-i şerîfe gelip rızâsıyla kethüdâlık talebinden ferâgat ve kasr-ı yed etmekle bezistân etrâfında olan bezzâz ve abacılardan yiğitbaşıları Mustafa ve Alemdar Mustafa ve Şehrî Ahmed Ağa ve Mütevellî ahmed Ağa ve es-Seyyid el-Hâc Mehmed ve Zeynelabidin ve el-Hâc Mustafa ve Hüseyin Ağa ve Ömer Beşe ve es-Seyyid Ahmed Ağa ve es-Seyyid el-Hâc Mustafa ve es-Seyyid Abdullah Çelebi ve Ömer Ağa ve Beşiktaşlı Molla Ahmed ve İstavri Ali Beşe ve Mehmed Ağa ve İbrahim Ağa ve Vekîlharç Mustafa Çelebi ve Molla Halil ve Hüseyin Beşe ve Molla İsmail ve es-Seyyid Mehmed ve Veli Beşe ve Alemdaroğlu Mehmed ve Çorbacızâde es-Seyyid Mustafa ve Molla Yahya ve el-Hâc Mahmud [ve] el-Hâc Mehmed ve Memiş Ağa [ve] Molla Mehmed ve Mehmed Emin ve Mehmed Said ve Molla Mustafa ve İsmail Çelebi ve el-Hâc Mehmed ve Bezzâzlardan Zindankapısı Ustabaşısı Halil Ağa ve Molla Mehmed Sadık ve Süleyman Çelebi ve Kasım Ağa ve el-Hâc Hasan ve Yusuf Çelebi ve zimmi ustabaşısı Kostanti ve Simyon ve Lagor ve Vezneciler Ustabaşısı Manol ve Ramo ve Panayot ve Yorgi ve Ayvansaray Ustabaşısı Yorgi ve Lukaki ve Panayot ve Mihal ve Edirnekapısı Ustabaşısı Piyo ve Vasil ve Lazo ve Miya nâm kimesneler içlerinden Yakub b. el-Hâc Osman nâm kimesneyi kethüdâ ihtiyâr ve ittifâk etmeleriyle zikr olunan kethüdâlık ittifâkları üzere mezbûr İsmail’in mahlûlünden mezbûr Yakub’a tevcîh buyrulup yedine berat-ı âlîşân ihsân buyrulmak ricâsına bi’l-iltimâs huzûr-ı âlîlerine i‘lâm olundu. Fî 10 Rebî‘ülevvel sene 1180.