İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 281 Hüküm no: 297 Orijinal metin no: [131-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evkaf-ı hümayuna bağlı akarların gedikleri hakkında nizamname Evkāf-ı hümâyûn-ı hazret-i cihândârîden olan akārâtın gediklerine kimesne mu‘âraza ve dâhil eylemeye. Ma‘rûz, İşbu defter-i müfredât ve zahrında mastûr bin yüz yetmiş yedi ve yetmiş sekiz târîhleriyle sâdır olan emr-i aliyye mûceblerince taraf-ı hazret-i cihândârîden binâ ve ihyâ buyrulan müstagallât ve müsakkafâtın esnâf beyninde te‘âmül ve tegābünleri ile mütekavvim ve mu‘teber ve cârî ve örf-i belde olduğu üzere gedikleri mu‘accelesi taraf-ı vakf-ı hümâyûna îrâd ve hâsıl kayd ve gedik olmağla mütehammil olan üç bâb hanın derûn ve bîrûnunda olan odaları ve mahzenleri ve dükkânları ve ekmekçi ve francalacı ve simitçi ve çörekçi fırınları ve mumhâne ve boyahâneler ve hamam ve şişehâne ve helvacı ve şerbetçi ve hoşâbcı ve kebabçı ve aşçı ve işkenbeci ve başçı ve paçacı ve camcı ve câmeşûycu ve hallâc ve cüllâh ve sarrâf ve kasab ve attâr ve kahveci ve manav dükkânları ve mahzenleri ve kemerci mahzenleri ve leblebici ve şekerci ve bakkāl ve turşucu ve balıkçı ve urgancı ve doğramacı ve keresteci ve sâir erbâb-ı hirfetin gedik olmağa muhtemel İslambol ve Üsküdar ve Yoros ve İzmir [132] ve Sakız ve sâir mahâll-i müteferrikada vâkı‘a müsakkafâta tâliblerine müceddeden gedik olmak üzere verildikde defter-i evkāfda uhdelerine kayd ve sebt ve yedlerine şurûtuyla başka başka gedik temessükleri i‘tâ ve gedik mutasarrıfları fevt oldukda gedikleri evlâdına intikāl ve bir âharına ferâğ murâd eylediklerinde bâ-izn-i mütevellî ve bâ-temessük-i vakıf ferâğ ve kasr-ı yed ve bilâ-veled fevt olanların gedikleri taraf-ı vakf-ı hümâyûndan zabt ve mu‘accele ile tâliblerine verilmek ve bi’l-icâreteyn musakkafât-ı mezkûre mutasarrıfları gedik husûsuna aslâ dahl ve ta‘arruz eylememek ve esnâf kethüdâları ve yiğitbaşıları ve ustaları taraflarından bizim gedik husûsunda başka nizâmımız vardır, ma‘rifetimiz ile alınır verilir deyü müdâhale olunmak ve kasab gediklerine Kara Mustafa Paşa Vakfı tarafından dahi aslâ ta‘arruz olunmamak meşrût kılınıp lâkin bu târîhe dek taraf-ı vakf-ı hümâyûndan gedik temessükleri verilenlerin ba‘zıları Başmuhâsebe’ye kaydolunmamağla kaydolmayanlar dahi şurûtuyla kaydolunmasını kāimmakām-ı vakf-ı hümâyûn Mehmed İzzet Efendi arz ve istid‘â etmekle vehc-i meşrûh üzere ta‘yîn olunan ve fî-mâ-ba‘d dahi ta‘yîn olunacak gediklerin nizâmı şurût-ı mezkûre ile mukayyed ve gedik mutasarrıfları bilâ-veled fevt olanların gediklerine akrabâdan vârisleri ve beytülmal emînleri bir dürlü dahl ve ta‘arruz etmeyip ve müsakkafât-ı vakf-ı hümâyûnda olan sakā gediklerine dahi sakā başılar bizim fermânımız vardır mahlûl olan sakā gediklerini biz zabt ederiz deyü vechen mine’l-vücûh ta‘arruz eylememek kaydları zam ve derc olunarak cümlesi Başmuhâsebe’ye ba‘de’l-kayd musakkafât-ı mezkûre vâkı‘a olan mahâlden lede’l-iktizâ mürâca‘at ve düstûrü’l-amel kılınmak için İslambol ve Üsküdar ve İzmir ve Sakız kādılarına taht-ı kazâlarında olan müstagallât ve müsakkafâtın şurût-ı nizâmına dâir husûsuyla başka başka verilen evâmirin şurûtu tafsîl ve bu şurût dahi zam ve ilhâkıyla evâmir-i aliyye ısdâr kılınıp ve Haremeyn-i muhteremeyn müfettişine ve askerî ve beledî kassâmlarına ve beytülmal emînlerine ve İslambol’da olan mehâkime ve Yoros nâibine ve Bostaniyân Ocağı Müfettişi taraflarına ve sâir iktizâ eden mahâllere ilmühaberleri verilmek bâbında fermân-ı âlîleri sudûru iktizâ eylediği huzûr-ı âlîlerine i‘lâm olundu. Fî 12 Rebî‘ülevvel sene 1180.