İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 283 Hüküm no: 300 Orijinal metin no: [133-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo ile Sano’nun birbirlerinin zimmetlerini ibra etmeleri İbrâ Ma‘rûz, Hâmil-i arzuhâl Sano zimmînin hasmı Rumeli’de Ergiri kazâsına tâbi‘ Sarakinişte nâm karye ahâlîsinden olup Unkapanı’nda kasab olan Hıristo v. Mitro mahmiye-i İslambol’da meclis-i şer‘-i hatîrde ahâlî-i mezbûreden merkūm Sano ile terâfu‘larında on üç sene mukaddem karye-i merkūme subaşısı ma‘rifetiyle olan salyânede merkūm Sano’nun hissesine tarh olunan altmış iki buçuk guruşa ben kefil olmuş idim deyü merkūm Sano’dan bundan akdem taleb etmiş idim. Hâlâ hisse-i mezkûresini kendi asâleten verdiği ma‘lûmum olmağla zikr olunan salyâne hissesine ve beynimizde ma‘lûm kırk beş bin akçeye müte‘allıka merkūm Sano ile aslâ da‘vâ ve nizâ‘ım olmayıp ve bu husûslara müte‘allık da‘vâdan zimmetini ibrâ etmemle merkūm Sano zimmetinde aslâ hakkım yokdur deyü ikrârını merkūm Sano tasdîk eylediği iltimâslarıyla huzûr-ı âlîlerine i‘lâm olundu. Fî 16 Rebî‘ülevvel sene [11]180.