İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 285 Hüküm no: 304 Orijinal metin no: [134-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemhacı esnafından Halil ve Hüseyin’in mevcut tezgâhlarından başka tezgâh işletmemeleri Kemhacı esnâfına müte‘allık Mahmiye-i İslambol’da kemhacı esnâfı ustalarından arzuhâl eden Halil ile Hüseyin nâm kimesne dâ‘îhânede Kemhacılar Kethüdâsı İsmail ve yiğitbaşıları Ahmed ile terâfu‘larında yedimizde olup hâlâ isti‘mâl eylediğimiz birer destgâhımızdan mâ‘adâ birer destgâhımız dahi olup bundan akdem esnâf-ı mezkûre beynlerinde nizâm verip bi’l-cümle destgâhlarını ta‘dâd ve defter esnâsında bizim iki destgâhımız sehven kayd ve dâhil-i defter olmamağla şimdi biz birer destgâh dahi işletmek murâd eylediğimizde mezbûrân İsmail ve Ahmed mümâna‘at ederler deyü teşekkî, onlar dahi cevâblarında zikr olunan defter müdde‘iyân-ı mezbûrân Halil ve Hüseyin’in dahi ittifâklarıyla olup ve Başmuhâsebe’ye kayd ve ziyâde olmamak bâbında fermân-ı âlîşân ibrâz ve nazar olundukda mezbûrân Halil ve Hüseyin birer destgâhla mukayyed ve ziyâde destgâhları kaydı bulunmadığından gayrı hakīkat-i hâl vech-i meşrûh üzere olduğunu kemhacı ustası ihtiyârlarından diğer İsmail ve Abdurrahman ve İbrahim ve diğer İbrahim ve Mehmed Arif nâm kimesneler haber vermeleriyle fermân-ı âlîşân mûcebince mezbûrân Halil ve Hüseyin kendi destgâhlarından mâ‘adâ muhdes destgâh ittihâz etmemek iktizâ eylediği bi’l-iltimâs huzûr-ı âlîlerine i‘lâm olundu. Fî 17 Ra sene 1180.