İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 285 Hüküm no: 305 Orijinal metin no: [134-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Kavak Kalesi’nde hapis bulunan Hatice’nin oğulları Süleyman ve Mehmed Emin’in serbest bırakılmaları
Sekerânen nağra ile Kavak Kal‘ası’ndan ıtlâk
Ma‘rûz,
Hocapaşa kurbünde Karaki mahâllesi sâkinlerinden arzuhâl eden Hadîce’nin oğulları Süleyman ve Mehmed Emin arzuhâlinden derc olunduğu üzere Yalıköşkü önünde sekerânen nağara vuran Şehrî İsmail ile bir kayıkda bulunmağla mezbûr Süleyman işbu derkenâr olunduğu vech üzere Safer’in dördüncü günü târîhinde mezbûr Mehmed Emin dahi yeniçeri olmağla âhar arzuhâlde kezâlik derkenâr olunduğu üzere Safer’in beşinci günü târîhinde Kavak Kal‘asına vaz‘ olunup müddet-i mezkûreden beri mezbûrân Süleyman ve Mehmed Emin’in te’dîb olunduklarını ve fî-mâ-ba‘d bu makūle fezâhat ve şenâ‘atde bulunmamak üzere nefslerine ve hîn-i mutâlebede izhârlarına mahâlle-i mezbûreden Müezzin Hüseyin ve Berber Halil ve Halil Ağa ve Çörekçi Ahmed ve Üveyi babaları Mustafa ve Yusuf Ağa ve Attâr Ahmed ve Çubukçu Ahmed ve Arayıcı el-Hâc Ebubekir ve Ali ve Fesçi el-Hâc Hasan nâm kimesneler kefil olmalarıyla ancak mezbûrân Süleyman ve Mehmed Emin’in Kavak Kal‘asından ıtlâkını istid‘â eyledikleri ber-mûceb-i fermân-ı âlîşân huzûr-ı âlîlerine i‘lâm olundu.
Fî 18 Ra sene 1180.
|