İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 286 Hüküm no: 306 Orijinal metin no: [134-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hasan’ın evine gizlice girip eşya çalarken yakalanan Yahya b. Mehmed’in cezalandırılması Sirka töhmetiyle Ma‘rûz, Büyüklanga kurbünde Mercimek mahâllesinde sâkin arzuhâl eden İsmail b. Hasan meclis-i şer‘-i şerîfe ihzâr etdirdiği mahâlle-i mezbûre civârında sâkin ve Yenikapı’da kahveci Yahya b. Mehmed mahzarında mezbûr Yahya bu gece hufyeten menzilime duhûl ve işbu mu‘âyene olunan mecmû‘u kırk iki guruş takvîm olunan bir kaput ve bir kırmızı şâlî selâmlık odamdan ve bir cild kafa ve bir kākum kürkümü harem odamdan ahz ve zikr olunan şala sarıp firâr ederken muttali‘ olduğumda sâ‘at yedide menzilim içinde harem kapısıyla selâmlık kapısı cânibinde eşyâ-yı mezkûre yedinde olduğu hâlde tutup ve civârında Müslimîni çağırdıp irâet ve işhâd eyledim deyü da‘vâ ve mezbûr Yahya cevâbında mezbûr İsmail’in hâlâ zevcesiyle halitamız olmağla mezbûre beni üç gece mukaddem çağırmağla ben dahi varıp üç geceden beri mezbûr İsmail’in harem odasında zevcesiyle ma‘an bulunmağla bu gece mezbûr İsmail üzerimize gelip ve beni ahz eyledi deyü hilâf-ı şer‘-i şerîf mezbûr İsmail’in menziline duhûlünü ikrâr ve eşyâ-yı mezkûreyi ahzını inkâr etmekle eşyâ-yı mezkûre mahâll-i mersûmda vakt-i merkūmda mezbûr Yahya’nın yedinde olduğu hâlde mu‘âyene ve müşâhede edenlerden mahâlle-i mezbûrede sâkin Terzi Osman b. Ömer ve Yedekçi Mehmed Paşa ittibâ‘ından İbrahim Ağa b. Ömer nâm kimesne edâ-yı şehâdet etmeleriyle mahâlle-i mezbûreden tezkiye olundukda yirmi sekiz nefer Müslimîn makbûletü’ş-şehâde olduklarını ihbâr ve şer‘an makbûle olmağın bu makūlelerin ta‘zîri re’y-i âlîlerine menût mevâddan olduğu ma‘lûm-ı devletleri buyruldukda emr ü fermân veliyyü’l-emrindir. Fî 19 Ra sene 1180.