İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 287 Hüküm no: 307 Orijinal metin no: [135-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Bekir’in katledilen kardeşi Ali’nin diyetinden dolayı Abdurrahman ve sairlerinin zimmetlerini ibra etmesi Kasâme ve diyetine müte‘allık da‘vâdan ibrâ, 11 [guruş] Ma‘rûz, Anadolu’da Hacı Bektaş ma‘a Mucur kazâsına tâbi‘ Küçük Kavak nâm karye ahâlîsinden arzuhâl eden Ahmed Meclis-i şer‘-i hatîrde derûn-ı arzuhâlde şikâyet eylediği Terkoz nâhiyesinde Nakkaş karyesi ahâlîsinden Abdurrahman nâm kimesne mahzarında yetmiş dokuz senesi Ramazanı’nda Terkoz nâhiyesinde Kalkandere nâm mahâlde kuzucu iken cerîhan katîl bulunan Ali b. Bekir b. Cafer benim li-ebeveyn karındaşım olup ve verâseti benim ile zikr olunan Kavak karyesinde olan anamız Meryem ve kız karındaşlarımız Âişe ve Zeyneb’e münhasıra olmağla kasâme ve diyetini taleb ve da‘vâ ve kabz için mezbûrât taraflarından işbu yedimde olan hüccet mantûkunca beni tevkîl, ben dahi Terkoz nâhiyesine varıp ve zikr olunan mahâllin etrâfında olan kurâdan Çilingir ve Baklalı ve Türk Âişe? ve Haraççı karyeleri ahâlîlerinden Terkoz nâibi huzûrunda asâleten ve vekâleten da‘vâ ve kātilini suâl eylediğimde onlar dahi katîl-i mezbûr Ali’nin kātili ma‘lûmumuz olmayıp lâkin işbu mezbûr Abdurrahman için kātili ol bilir demeleriyle ben dahi mezbûr Abdurrahman’ı ihzâr etmiş idim. Ol dahi mezbûr Ali’nin kātilini bilmeyip ve zikr olunan kurâ dahi mahâll-i mezkûre ba‘îd ve savt istimâ‘ olunmamağla mezbûr Abdurrahman kat‘â li’n-nizâ‘ malından bana on bir guruş verip ve da‘vâsından zimmetimi ibrâ etdikde ben dahi on bir guruşu ahz u kabz edip karındaşım mezbûr Ali’nin kasâme ve diyetine müte‘allıka da‘vâdan gerek mezbûr Abdurrahman’ın ve gerek ahâlî-i kurâ-i mezkûrenin zimmetlerini asâleten ve vekâleten ibrâ eyledim dediğini mezbûr Abdurrahman tasdîk ve bu vechile kat‘-ı nizâ‘ eyledikleri mübâşiri iltimâsıyla huzûr-ı âlîlerine i‘lâm olundu. Fî 19 Ra sene 1180.