İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 287 Hüküm no: 308 Orijinal metin no: [135-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurumlu Ahmed’in divanhanesi Süleyman aleyhindeki rüşvet iddiasından men olunması Bi-tarîkı’r-rüşve men‘ 425 [guruş] Ma‘rûz, Arzuhâl eden Erzurumlu es-Seyyid Ahmed Meclis-i şer‘-i hatîrde derûn-ı arzuhâlde mezkûr Dîvânhâneci Süleyman ile terâfu‘larında mezbûr Süleyman yetmiş dokuz Şa‘bânı’nın on beşinci günü rüşvet tarîkiyle malımdan dört yüz yirmi beş guruşumu ahz etmekle hâlâ taleb ederim deyü da‘vâ mezbûr Süleyman cevâbında müdde‘î-i mezbûr es-Seyyid Ahmed Erzurum Yemîn ve Yesâr Ağalığı’na tâlib olmağla üzerine tevcîh ve berat etdirmekle harc-ı aklâm için ancak bana üç yüz yirmi beş guruş verip ve mahâllerine teslîmime emretmekle ben dahi mezbûr es-Seyyid Ahmed’in emri üzere mahâllerine teslîm edip hattâ mezbûr es-Seyyid Ahmed’e târîh-i mezkûrda odaya gelip meblağ-ı mezkûr üç yüz yirmi beş guruşu mahâllerine teslîm eylediğimi ikrâr ve husûs-ı mezkûra müte‘allıka da‘vâdan zimmetimi ibrâ etmiş idi deyü ba‘de’d-def‘ ve’l-inkâr mezbûr Süleyman def‘-i meşrûhunu lede’t-tezkiye udûlden oldukları ihbâr olunan Bektaş b. İshak ve Ahmed b. Mustafa nâm kimesneler şehâdetleriyle isbât etmeğin mûcebiyle müdde‘î-i mezbûr es-Seyyid Ahmed mezbûr Süleyman ile şer‘an mu‘ârazadan men‘ olunmak iktizâ eylediği mübâşiri çavuş kulları iltimâsıyla huzûr-ı âlîlerine i‘lâm olundu. Fî 18 Rebî‘ülevvel sene [11]80.