İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 288 Hüküm no: 309 Orijinal metin no: [135-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat’ta Tavaşi Ali Ağa Vakfı’ndan olan ve depremde zarar gören Yahudihane’nin tamir olunması Keşf-i Yahûdîhâne Ma‘rûz, Balatkapısı dâhilinde el-Hâc İsa mahâllesinde vâki‘ bir tarafdan Cevher Ağa Vakfı’ndan Yahûdîhâne ve bir tarafdan Tavâşî Ali Ağa Vakfı’ndan yine Yahûdîhâne ve bir tarafdan Yahûdîler sinavesi havlusu ve bir tarafdan tarîk-i âm ile mahdûd üç tabakada on dört bâb oda ve dehliz ve tahtında yedi kepenk dükkânı müştemil olup ba‘zı odaları etfâl-i Yahûda ta‘lîm için i‘dâd olunan Yahûdîhâne Bâbüssa‘âde Ağası nezâretlerinde olan evkāfdan mezkûr Tavâşî Ali Ağa Vakfı’ndan iki kıt‘a temessük mantûkunca Klara bt. Paruh Yahûdîye tasarrufunda olmağla harâba müşrif iken zelzeleden bi’l-külliye harâb ve kābil-i süknâ olmamağla ta‘mîr ve termîmi için arzuhâlleri bâlâsına sâdır olan fermân-ı âlîlerine imtisâlen taraf-ı dâ‘îlerinden keşif nâibimiz es-Seyyid Halil Efendi ve Haremeyn-i muhteremeyn müfettişi Ahmed Necib Efendi tarafından Başkâtib Hasan Efendi dâ‘îleri hâssa mi‘mârlarından Mehmed Emin ve Ahmed Halîfeler ile mahâll-i merkūma varıp vakf-ı mezkûr mütevellîsi hâzır olduğu hâlde mu‘âyene ve misâha eylediklerinde ebniyesinin vaz‘-ı kadîmi terbî‘an iki yüz seksen yedi buçuk ve kadden on zirâ‘ bulunup kābil-i süknâ olmayacak mertebe harâb ve ta‘mîre muhtâc olduğunu mi‘mârân-ı mezbûrân bi’l-mu‘âyene ihbâr eyledikden sonra mahâlle-i mezbûre ahâlîsinden dahi ihtiyâten istihbâr eylediklerinde mahâlle-i mezbûre İmamı Osman Efendi ve Balat Câmi‘-i şerîfi İmamı Mahmud Efendi ve Ahmed Efendi ve el-Hâc Mahmud ve Mehmed Emin Ağa ve Hasan Ağa ve Molla Abdullah ve İbrahim Beşe [136] ve el-Hâc Ömer ve Ali ve el-Hâc Hasan nâm kimesneler vaz‘-ı kadîmi minvâl-i muharrer üzere olup ta‘mîr olunduğu sûretde kimesneye zarârı yokdur deyü ba‘de’l-ihbâr merkūme Klara zikr olunan Yahûdîhâneyi bâ-re’y-i mütevellî vaz‘-ı kadîminden noksân dokuz zirâ‘ kad ile iki tabakada altışar bâb oda ve tahtında yedi kepenk dükkân ile ta‘mîr olunması bâbında fermân-ı âlîleri sudûrunu istid‘â eylediklerini mezbûrân dâ‘îleri gelip inhâ eyledikleri ber-mûceb-i fermân-ı âlîşân huzûr-ı âlîlerine i‘lâm olundu. Fî 10 Rebî‘ülevvel sene 1180.