İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 289 Hüküm no: 310 Orijinal metin no: [136-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyüklanga’da Mercimek mahallesi halkından İsmail Çelebi ve eşi Ayşe bt. Mehmed’in kanunsuz herhangi bir hareketleri olmadığının tescili Mezbûrenin hüsn-i hâline Ma‘rûz, Büyüklanga kurbünde Mercimek mahâllesinde sâkin İsmail Çelebi b. Hasan’ın ve zevcesi Âişe bt. Mehmed’in keyfiyet-i hâlleri mahâllesi ahâlîsinden ve vukūfu olanlardan suâl ve tefahhus için lisânen vârid olan fermân-ı âlîlerine imtisâlen kıbel-i şer‘-i şerîfden Kâtib Ali Efendi irsâl olunup ol dahi bu husûsa mübâşir olan kapıkethüdâsı ve sâir ümenâ-yı şer‘le zikr olunan Mercimek mahâllesine varıp gerek mahâlle-i mezbûre ahâlîsinden ve gerek civârında sâkin vukūfu olanlardan suâl ve tefahhus eylediklerinde mahâlle-i mezbûre imamı Hâfız Hüseyin Efendi ve müezzini es-Seyyid Mustafa ve es-Seyyid Mehmed Ağa ve İbrahim Çelebi ve Abdülkadir ve el-Hâc Ebubekir ve el-Hâc Mehmed ve Ömer Yazıcı ve Mustafa Çelebi ve el-Hâc Osman ve İbrahim Çelebi ve Osman Ağa ve es-Seyyid Mehmed ve Baklalı İmamı Hâfız Osman Efendi ve Osman Ağa ve el-Hâc Mehmed ve Ahmed Ağa ve Hasan Efendi ve Mekteb Hocası Muslihiddin Efendi ve eş-Şeyh İsmail Efendi ve Halil Beşe ve Hasan ve es-Seyyid Abdülhalim ve Mehmed Emin ve Salih Beşe ve Ali Beşe ve Hüseyin Yazıcı ve Eynebey mahâllesi İmamı Hasan Efendi ve Müezzini Mehmed ve Mustafa ve İbrahim ve Arif İbrahim ve Osman Beşe ve Süleyman Beşe ve el-Hâc İsmail ve Ahmed Çavuş ve Fazlı Çavuş ve es-Seyyid Süleyman ve İsmail Beşe ve Ali Beşe ve Berber Mustafa ve mahâlle bekçisi Mehmed b. Ali ve sâir yüz neferden mütecâviz Müslimîn gerek mezbûr İsmail’in ve gerek mezbûre zevcesi Âişe’nin bu âna gelince hilâf-ı şer‘-i şerîf vaz‘ ve hareketleri ma‘lûmumuz olmayıp ırzlarıyla mukayyedlerdir deyü hüsn-i hâllerini haber verdiklerini mezbûr dâ‘îleri gelip inhâ eylediği ma‘lûm-ı devletleri buyruldukda emr ü fermân hazret-i men-lehü’l-emrindir. Fî 19 Ra sene 1180.