İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 290 Hüküm no: 311 Orijinal metin no: [136-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador ve Mahuk’un, Karabet aleyhindeki Boyacı değirmeni iddiasından men olunmaları Boya değirmen nizâ‘ından men‘ Ma‘rûz, Arzuhâl eden Haçador ve Manuk nâm zimmîler meclis-i şer‘-i hatîrde Atmeydanı’nda Fazlı Paşa Sarayı’nda Kütüphâne-i hümâyûn Vakfı’ndan boya değirmeninde müstecir ve derûn-ı arzuhâlde merkūmü’l-ism olan Karabet nâm zimmî ile terâfu‘larında değirmen-i mezkûr taraf-ı vakf-ı mezkûrdan uhdemizde ve içinde mevcûd gedik ta‘mîr [ta‘bîr] olunur âlâtı diğer Karabet ile iştirâk-i seviy üzere mülkümüz olup tarafımızdan işbu merkūm Karabet zimmîyi değirmen-i mezkûra ücretle komuş iken merkūm Karabet değirmen-i mezkûra bizi tasarrufdan men‘ eder deyü da‘vâ ve merkūm Karabet cevâbında değirmen-i mezkûr taraf-ı vakıfdan basmacı ustaları uhdesinde olmağla merkūmân bundan akdem zuhûr edip hıyânetlerine binâen ihrâç olunup ve yerine beni ikāmet etmişler idi deyü takrîrini basmacı ustalarından hâzirûn olan Kethüdâ Vekîli el-Hâc İbrahim ve Yiğitbaşı es-Seyyid Abdullah ve el-Hâc Mahmud ve es-Seyyid Mehmed ve İsmail’den her biri tasdîk ve müdde‘iyân-ı merkūmân Haçador ve Manuk’un değirmen-i mezkûrda bir aded değirmen taşı ile iki kantardan gayrı alâkaları olmadığı ikrârlarıyla sâbit olmağın mûcebiyle değirmen-i mezkûr için bî-vech mu‘ârazadan men‘ olundukları bi’l-iltimâs huzûr-ı âlîlerine i‘lâm olundu. Fî 19 Rebî‘ülevvel sene 1180.