İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 291 Hüküm no: 314 Orijinal metin no: [137-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görevini bırakan Kazzazlar Kethüdası Süleyman’ın yerine Ömer b. Abdülbaki’nin tayin olunması Kazzâzlar kethüdâlığı kasr-ı yed Ma‘rûz, Mahmiye-i İslambol’da Kazzâz esnâfından arzuhâl eden Ustabaşı Tomas ve Avanis ve Kevork ve Asvador ve Serkiz ve Rafael ve Ohan ve Mardıros ve Abraham ve Haçador ve İmirze ve Afael ve Yako ve Yasef İstefan ve diğer Serkiz ve Haçador ve Avanek ve İşnehan ve Alot ve Mosi ve diğer Afael ve Vasil ve Mosi ve İsak ve Avram ve Sabatay ve Satıl ve diğer Avram ve diğer Rafael ve Vakado ve Yanaki ve Çolak Bogos ve Artin ve Bedros nâm zimmîler dâ‘îhânede bâ-berat-ı âlîşân kethüdâları olan Süleyman b. Abdullah’dan umûrumuzu rü’yetden tekâsül eylediğinden mâ‘adâ hilâf-ı şer‘-i şerîf ba‘zımızı tecrîm eder deyü teşekkî etmeleriyle mezbûr Süleyman dahi rızâsıyla kethüdâlıkdan kasr-ı yed ve merkūmûnun muhtârları olan Hâfız Ömer b. Abdülbaki nâm kimesneye ferâgat etmeğin zikr olunan kethüdâlık-ı merkūm Süleyman’ın kasr-ı yedinden mezbûr Ömer’e tevcîh ve yedine berat-ı âlîşân ihsân buyrulmak bâbında emr ü fermân hazret-i men-lehü’l-emrindir. Fî 23 Rebî‘ülevvel sene 1180.